Er það satt að á miðju Íslandi sé stórt stöðuvatn þar sem Íslendingar fórna ungum börnum fyrir guði sína?“ spyr ungi Keníamaðurinn Elvis Mogunde, nemandi í skóla ABC í Kenía.Blaðamenn Stundarinnar líta forviða af tölvuskjánum og hvor á annan. „Hvað sagði hann?“
Elvis er einn þeirra sem hafa lent í miðri hringiðu harðra deilna innan ABC samtakanna þar sem ásakanir um mútur, hótanir og rógburð hafa gengið manna á milli frá því í vor. Þegar hefur einn verið kærður vegna alvarlegra hótana í garð formanns ABC á Íslandi. Upphaf þessara deilna má rekja til stjórnarfundar ABC Kenía sem haldinn var í apríl. Á fundinum voru þrír íslenskir stjórnarmenn reknir úr stjórninni og heimamenn settir í þeirra stað. Meðal þeirra reknu var Guðrún Margrét Pálsdóttir, stofnandi og formaður ABC barnahjálpar. Í tilkynningu frá ABC segir að með þessu hafi Þórunn Helgadóttir, formaður ABC Kenía, brugðist trausti ABC og hreinlega reynt að sölsa undir sig félagið og eignir þess. Þórunn telur hins vegar að ABC á Íslandi geti ekki rekið sig úr formannsstöðunni í Kenía þar sem um tvö sjálfstæð félög sé að ræða. Hún situr því sem fastast og hefur stofnað ný samtök á Íslandi, Íslensku Barnahjálpina, sem sér um að safna styrkjum og framlögum hér á landi. Ástandið í Kenía er alvarlegt. Glæpagengi eru sögð hafa komið að skólanum, starfsmenn hafa þurft að flýja borgina vegna hótana og nemendur verið hvattir til óeirða.
Fann samtökin í bæklingi á bensínstöð
Hún er fyrir löngu orðin þekkt sagan af konunni sem árið 2004 gekk inn á bensínstöð í Grafarvogi og tók með sér bækling. Bæklingurinn, sem var gefinn út af ABC barnahjálp, hreyfði við konunni sem í kjölfarið hafði samband við samtökin og bauð fram krafta sína. Þessi kona var Þórunn Helgadóttir. Hún var í kvikmyndagerð á þeim tíma og bauðst meðal annars til þess að gera myndband fyrir samtökin. Þeirri hugmynd var tekið fagnandi. Þórunn starfaði sem sjálfboðaliði hjá ABC samtökunum fyrstu tvö árin og fór meðal annars með í ferð til Indlands. Sú ferð hafði mikil áhrif á hana en þá kynntist hún í fyrsta skiptið starfi ABC frá fyrstu hendi.
Hörkudugleg hugsjónakona
Saga Þórunnar var meðal annars sögð í sjónvarpsþættinum Kompási á Stöð 2 árið 2009. Sjónvarpsmaðurinn Logi Bergmann Eiðsson fór til Kenía, fylgdist með starfinu og ræddi við Þórunni. Umfjöllun Kompáss vakti mikla athygli á sínum tíma en fátæktin og neyðin í Kariobangi hverfinu í Naíróbí var nánast áþreifanleg. Í þættinum er meðal annars fullyrt að hjálparstarfið í Kenía sé alíslenskt.
Þórunn segist í samtali við Stundina hafa fundið að henni var ætlað að setjast að í Kenía. Í fyrstu vikunni þar ytra kynntist hún síðan eiginmanni sínum, Samuel Lusiru Gona. Hann er nú einnig stjórnarmaður í ABC Kenía. Þau eiga saman ættleiddan dreng, hinn sjö ára Daníel Heiðar.
Þórunni er lýst sem
Athugasemdir