Þingmenn úr Samfylkingunni, Pírötum og Vinstri grænum hafa lagt fram þingsályktunartillögu þar sem lagt er til að Alþingi fordæmi aðgerðir Bandaríkjaforseta gegn múslimum. Flutningsmenn tillögunnar eru þau Logi Einarsson, Oddný G. Harðardóttir, Guðjón S. Brjánsson, Rósa Björk Brynjólfsdóttir, Smári McCarthy, Viktor Orri Valgarðsson og Ásta Guðrún Helgadóttir.

Þann 27. janúar síðastliðinn gaf forseti Bandaríkjanna út tilskipun þess efnis að fólki frá sjö ríkjum, Sýrlandi, Írak, Íran, Jemen, Lýbíu, Sómalíu og Súdan, væri óheimilt að koma inn í landið. Í greinargerð þingsályktunartillögunnar er bent á að bannið gildi um flóttamenn, einstaklinga með tilskyldar vegabréfsáritanir eða handhafa græna kortsins.

„Tilskipunin er fordæmalaus og lýsir mannfyrirlitningu, byggist á fordómum og grefur undan mannréttindum og þeim lýðræðislegu gildum sem almennt eru viðurkennd í vestrænum lýðræðisríkjum. Þá er hún fremur fallin til að kynda undir ófriði en tryggja öryggi. Zeid bin Ra'ad Zeid al-Hussein, yfirmaður mannréttindamála hjá Sameinuðu þjóðunum, hefur sagt aðgerðina ólöglega og setta fram af illum hug. Með henni fari að auki fjármunir í vaskinn sem ella gætu nýst í baráttu gegn hryðjuverkum.“

Málið var lagt fram á Alþingi í dag en þingmenn úr öllum flokkum stjórnarandstöðunnar nema Framsóknarflokknum mæla fyrir tillögunni.