Sveinbjörg Birna eini borgarfulltrúinn sem fékk ekki köku á afmælisdaginn

„Borg­ar­ráð Reykja­víkur kaupir afmæliskökur fyrir borg­ar­ráðs­menn þegar þeir eiga afmæli á fund­ar­degi borg­ar­ráðs. Nema fyrir einn,“ skrif­aði Svein­björg Birna Svein­björns­dóttir, borg­ar­full­trúi Fram­sóknar og flug­vall­ar­vina, á Facebook-síðu sína á laug­ar­dag­inn. Með færsl­unni deildi hún frétt DV um áhrifa­mikla aug­lýs­ingu Á allra vöru þar sem sjá má ungan dreng bíða eftir afmæl­is­gestum sem aldrei koma.

Í sam­tali við Stundina segir Svein­björg að hún hafi átt afmæli síð­ast­lið­inn jan­úar sama dag og borg­ar­ráðs­fundur var haldin og var ekk­ert gert úr því þá. Hins vegar hafi bæði Dagur B. Egg­erts­son borg­ar­stjóri og Júlíus Vífill Ingv­ars­son, borg­ar­full­trúi Sjálf­stæð­is­flokks, átt afmæli síðar á árinu þegar borg­ar­ráðs­fundur var hald­inn og þá hafi verið borin fram afmæliskaka fyrir þá.

Hún leggur áherslu á að með því að benda á þetta vilji hún ekki geng­is­fella ein­elti. Það að þetta geti gerst á æðstu stigum sam­fé­lags­ins sýni hins vegar hvað umræðan um ein­elti sé stutt á veg komin.

„Borg­ar­ráð Reykja­víkur kaupir afmæliskökur fyrir borg­ar­ráðs­menn þegar þeir eiga afmæli á fund­ar­degi borg­ar­ráðs. Nema fyrir einn.“ 

Áður ekki boðið með körlum

„19. júní í fyrra átti Dagur afmæli og það voru kökur og æðis­legt. Síðan eiga ekk­ert allir borg­ar­full­trúar afmæli á fimmtu­degi, þegar borg­ar­ráð fundar, þannig það er ekk­ert verið að halda upp á það ef þú átt afmæli á þriðju­degi en borg­ar­ráðs­fundur er á fimmtu­degi. Síðan átti ég afmæli 29. jan­úar og við vorum búnar að ræða þetta á milli okkar við stelp­urnar. Svo varð ekki neitt og ég var ekk­ert að stressa mig á því. Síðan í júní þá á Júlíus Vífill afmæli og þá eru kökur. Þá hugs­aði ég, já ok þessu er bara sleppt þegar ég á afmæli,“ segir Svein­björg og bætir við að það sé sér­kenni­legt að full­orðið fólk hagi sér svona.

Hún seg­ist áður hafa unnið á kar­lægum vinnu­stöðum þar sem ekki hafi verið óal­gengt að henni hafi ekki verið boðið með í sumar skemmt­anir. „Þar var mér ekki boðið með í veiði­ferð­ina,“ nefnir hún sem dæmi. „Ég hef aldrei litið á það sem ein­elti, heldur frekar að ég hafi ekki verið karl. Þegar við fórum út að borða og það var verið að fara á stripp­klúbb eftir mat­inn þá fóru kon­urnar ekki með. Það er allt annað,“ segir Svein­björg.   

Ekki einelti

Svein­björg seg­ist þó ekki ætla að líta á sig sem þol­anda ein­eltis. „Ég hef valið að líta svo á að þeir hafi ekki áttað sig á þessu. Þeir hljóta að hafa gleymt þessu. Það er eins og þegar maður gleymir því stundum að það sé búið að boða í afmæli og börnin manns eigi að fara, alveg eins og í þess­ari aug­lýs­ingu. Það eru mjög sterk skila­boð í henni. Við höfum lent í því að eftir skól­ann hjá stráknum mínum sendi ein mamman skila­boð um að það hafi bara þrír mætt í afmæli barns­ins síns. Þannig að maður tekur þetta til sín.

Engu að síður, út frá því sem var sagt í aðdrag­anda að ein­hverju afmælis­kaff­inu, þá spyr maður sig. Samt sem áður getur maður ekki lifað líf­inu með því að skil­greina sig sem þolenda. Maður verður að vera ger­andi. Þannig að næst þegar ég á afmæli þá mæti ég bara sjálf með kök­una,“ segir Svein­björg.

„Næst þegar ég á afmæli þá mæti ég bara sjálf með kök­una.“ 

Mörgum starfsmönnum líður illa

„Það sem er alvar­leg­ast í þessu er ekki þetta atvik heldur það að ef þetta er að eiga sér stað ann­ars staðar í borg­inni, á öðrum sviðum borg­ar­innar. Það rosa­lega hátt veik­inda­hlut­fall hjá Reykja­vík­ur­borg, að með­al­tali er það sjö pró­sent. Allir starfs­manna­stjórar tala um að ef þú ert með meira en 2-3 pró­sent þá er eitt­hvað sem þarf að skoða. Þetta hefur eitt­hvað með það að gera að fólki líður illa í vinn­unni. Spurn­ingin er af hverju því líður illa í vinn­unni. Ef þetta er svona á efstu stigum þá fer þetta niður, eins og ef for­eldri talar illa um vini sína þá er lík­legt að börnin geri það líka,“ segir Svein­björg Birna og bætir því við að starfs­menn Reykja­vík­ur­borgar hafi haft sam­band við sig og sagst líða illa í vinn­unni.