„Salsa er okkar einkatungumál“

Í landi stirð­busa og hliðar-saman-hliðar brenna senni­lega fáir fyrir salsa á sama hátt og þau Ást­hildur Val­týs­dóttir og Juan Camilo Román Estrada gera. Þau dansa salsa því sem næst á hverjum degi. Stundum taka þau stuttan snún­ing eftir morg­un­mat­inn, áður en þau halda út í dag­inn. Þau dansa á meðan þau elda, til að hvetja sig áfram í heim­il­is­stör­f­unum og halda sín einka-salsa-partí um helgar sem engum er boðið til nema þeim tveimur. „Mér finnst að hjóna­band eigi að vera þannig að maður gifti sig á hverjum degi. Sér­stak­lega þegar fólk er búið að vera lengi saman, eins og við. Maður þarf að skapa aðstæð­urnar til að kveikja aftur þessar sterku ást­ar­til­finn­ingar sem maður finnur í upp­hafi sam­bands. Allir geta fundið eitt­hvað sjar­mer­andi í hvers­deg­inum. Hjá okkur er það dans­inn,“ segir Juan.

Þau kynnt­ust fyrir tíu árum í Medellin, höf­uð­borg Kólumbíu. Þar bjuggu þau saman í eitt og hálft ár, þar giftu þau sig og áttu margar eft­ir­minni­legar stundir. Oftar en ekki kom salsa við sögu, enda órjúf­an­legur hluti af menn­ingu svæð­is­ins. Þau fluttu til Íslands einu og hálfu ári eftir að þau giftu sig. Hér tengja fáir við ást þeirra á salsa. „Salsa er okkar einka­tungu­mál á ein­hvern hátt og það eru okkar for­rétt­indi að skilja það bæði,“ segir Juan. „Það að eiga salsa saman er eitt af því sem færir okkur nær hvort öðru og gerir einka­líf okkar skemmti­legt. Gefur okkur krydd í lífið.“