„Svona umfjöllun getur orðið til þess að draga kjark úr brotaþolum framvegis til að leggja fram kærur,“ segir Jóhanna Sigurjónsdóttir, lögmaður tveggja kvenna sem kært hafa tvo menn fyrir kynferðisbrot. Ítarlega hefur verið fjallað um málið í fjölmiðlum síðustu daga eftir að Fréttablaðið sagði frá því á mánudag að íbúðin þar sem ofbeldið á að hafa farið fram hafi verið útbúin til nauðgana. Í gær steig Vilhjálmur H. Vilhjálmsson, verjandi annars sakborninga fram, og lýsti meðal annars gögnum málsins í smáatriðum. Jóhanna mun á morgun, fyrir hönd brotaþola, leggja fram kæru gegn Vilhjálmi fyrir leka á trúnaðarupplýsingum.
Samþykkt samræði og munnmök
Smáatriðin sem Jóhanna á við, og höfðu ekki komið fram áður í fjölmiðlaumfjöllun um málið, eru lýsingar Vilhjálms í viðtali við Morgunútvarpið á Rás 2 í gær. Þar sagði Vilhjálmur meðal annars: „Í fyrra tilvikinu viðurkennir minn maður að hafa átt samræði við stúlkuna. Það fór fram með samþykki þeirra beggja. Í málinu liggja fyrir gögn sem sýna að þau eiga í miklum og góðum samskiptum í um það bil mánaðarskeið eftir þetta. Þar á meðal strax nokkrum klukkutímum eftir að kynmökin eiga sér stað.“
Spurður nánar út í þessi samskipti segir Vilhjálmur: „Þetta eru samskipti á Facebook og þetta eru tólf blaðsíður. Þau eiga sér stað um langt skeið. Þessi samskipti eru á góðu nótunum. Þar er meðal annars farið yfir atburði þessa kvölds, hvort þetta hafi spurst út í skólanum og annað slíkt. En aldrei minnst einu orði á það að einhver þvingun eða refsiverð háttsemi hafi átt sér stað.
Athugasemdir