Önnur kvennanna í Hlíðamálinu svokallaða hefur verið kærð fyrir kynferðislega áreitni og nauðgun. Þetta staðfestir Vilhjálmur H. Vilhjálmsson, verjandi annars sakborninga í fyrra málinu, en hann skrifaði kæruna fyrir hönd umbjóðanda síns, sem áður hafði sjálfur verið kærður fyrir nauðgun af sömu konu. „Nú býst hann bara við breiðum stuðningi Druslugöngunnar og Stígamóta og Beauty tips við þennan brotaþola í þessu kynferðisbrotamáli og fjöldamótmælum við lögreglustöðina yfir því að kærða hafi ekki verið hneppt í gæsluvarðhald,“ segir Vilhjálmur í samtali við Stundina. 

Kæran var send til lögreglu á sunnudag og afhent réttargæslumanni brotaþola á hádegi í dag. Í kærunni sem Vilhjálmur skrifaði er konunni gefið að sök að hafa áreitt manninn kynferðislega og síðan nauðgað honum þar sem hann lá uppi í rúmi í Hlíðunum, nær svefni en vöku með því að renna niður buxnaklaufinni á honum, taka getnaðarlim hans út og stinga honum upp í sig í nokkrar sekúndur. Í kærunni kemur fram að fólkið fór saman niður í bæ að loknu prófi við Háskólanum í Reykjavík. Í kærunni er konan einnig ásökuð um að hafa áreitt manninn kynferðislega allt kvöldið bæði með orðum og í verki. Þar kemur fram að á Slippbarnum hefði konan elt manninn inn á salerni þar sem hún er sögð hafa káfað á honum og sagst vilja hafa kynmök við hann. Þá liggur fyrir í gögnum málsins að konan hafi farið með hinum manninum í Hlíðamálinu, sem hún kærði einnig fyrir nauðgun, í 10-11 og keypt sleipiefni.