Ólöf Nordal aftur í krabbameinsmeðferð: „Vissulega vonbrigði“

Ólöf Nordal þurfti að hefja krabba­meins­með­ferð að nýju um ára­mótin. Ólöf er inn­an­rík­is­ráð­herra og vara­for­maður Sjálf­stæðs­flokks­ins. Hún greinir frá þessu á Facebook-síðu sinni. Þar kemur fram að við reglu­bundið eft­ir­lit í lok síð­asta árs hafi komið í ljós hækkun á æxlis­vísum í blóði sem mæla fram­gang og stöðu krabba­meins. Við nán­ari skoðun hafi komið í ljós smá­vægi­legar breyt­ingar á kvið­ar­holi sem nauð­syn­legt var að bregð­ast strax við. 

Ólöf fór fyrst inn á Alþingi árið 2007, sem þing­maður Norð­aust­ur­kjör­dæmis. Árið 2009 færði hún sig um set og var þing­maður Reykja­vík­ur­kjör­dæmis suður frá 2009-2013. Þegar því kjör­tíma­bili lauk lét hún af afskiptum af stjórn­málum, en staf­aði sem for­maður banka­ráðs Seðla­banka Íslands.

Sumarið 2014 greindi hún fyrst frá því á opin­berum vett­vangi að hún hefði þurft að láta fjar­lægja ill­kynja æxli úr lík­ama sínum. „Á örskots­stundu skiptu fyrri plön engu máli, hvers­dags­legu verk­efnin víkja núna fyrir þeirri stærstu áskorun sem ég hef staðið frammi fyrir. Óboðinn gestur hafði nefni­lega sest að innra með mér,“ skrif­aði Ólöf þá á heima­síðu sinni.

Ólöf sneri fremur skyndi­lega aftur til stjórn­mála þegar hún tók við inn­an­rík­is­ráðu­neyt­inu af Hönnu Birnu Krist­jáns­dóttur í byrjun síð­asta árs, í kjöl­far þess að Hanna Birna sagði af sér vegna leka­máls­ins. Ólöf var síðan kjörin vara­for­maður Sjálf­stæð­is­flokks­ins í haust, en hún hafði áður verið vara­for­maður flokks­ins á árunum 2010-2013. 

Í færsl­unni sem hún birti fyrr í dag segir hún að það hafi vissu­lega verið von­brigði að þurfa að hefja lyfja­með­ferð að nýju en hún sé bjart­sýn og muni eftir sem áður sinna sínum störfum:

„Ég brenn enn fyrir að vinna fyrir almenn­ing og hug­sjónir mínar. Þessi þrösk­uldur sem ég þarf að yfir­stíga á næstu vikum breytir engu þar um. Núna stend ég frammi fyrir þessu verk­efni og þarf að klára það. Það er engin ástæða til ann­ars en að vera bjart­sýn.“