Ólafur Ólafsson, sem afplánar fjögurra og hálfs árs fangelsisdóm fyrir aðkomu sína að Al Thani málinu, hefur óskað eftir því við endurupptökunefnd að málið verið tekið til meðferðar og dómsuppsögu að nýju hvað hann varðar.
Í yfirlýsingu frá Þórólfi Jónssyni, lögmanni á Logos, segir að dómur Hæstaréttar hafi byggt á sönnunargögnum sem hafi verið ranglega metin. Er þar vísað í símtal tveggja manna, þar sem annar vísar til samtals við Óla um tiltekna þætti viðskiptanna. Telja verjendur Ólafs að þar hafi verið átt við Ólaf Arinbjörn Sigurðarsson lögmann, en Hæstiréttur taldi að vísað væri til Ólafs Ólafssonar.
Á þessum grunni óskar Ólafur eftir endurupptöku málsins. „Verjendur höfðu ekki tækifæri til þess að leiðrétta þessi mistök Hæstaréttar því símtalið var ekki tekið til efnislegrar meðferðar í málflutningnum, fyrirliggjandi gögn bentu ekki til þess að vafi ríkti um þetta atriði og ekkert gaf til kynna að dómararnir skildu efni símtalsins með öðrum hætti en héraðsdómur, ákæruvald, verjendur og ákærðu,“ segir í yfirlýsingunni.
„Ég heiti Óli og ég er lögfræðingur“
Eiginkona Ólafs, Ingibjörg Kristjánsdóttir, reisti málið með aðsendri grein í Fréttablaðinu þar sem hún sagði Hæstarétt hafa farið mannavillt. Í kjölfarið sagði lögmaður Ólafs að næsta skref yrði að óska eftir endurupptöku á málinu, sem nú hefur verið gert.
Eftir að grein Ingibjargar birtist í Fréttablaðinu náði dv.is tali af Ólafi Arinbirni og spurði hvort það væri rétt að hann væri þessi Óli sem vísað væri til í símtalinu: „Ég get eiginlega ekkert sagt þér um þetta, bara að ég heiti Óli og ég er lögfræðingur,“ var svar hans.
Ólafur Arinbjörn, er líkt og Þórólfur lögmaður á Logos. Þriðji lögmaður Logos sem leikur lykilhlutverk í málinu, Bjarnfreður Ólafsson, steig þá fram í Viðskiptablaðinu og sagðist hafa verið að ræða um Ólaf Arinbjörn en ekki Ólaf Ólafsson í símtalinu. Í kjölfarið var Ólafur Arinbjörn inntur aftur eftir svörum, og nú í Fréttablaðinu. Hann sagði þá að hann hefði augljóslega ekki verið aðili að þessum símtölum: „En ef Bjarnfreður hefur sagt að hann hafi talað við mig þá er það væntanlega rétt.“
Saksóknari segir önnur gögn benda á sekt Ólafs
Í beiðni um endurupptöku kemur skýrt fram að lögmenn Ólafs líti svo á að dómur Hæstaréttar byggi á þeim upplýsingum sem vísað er til í umræddu símtali. Hafi dómurinn farið mannavillt sé hann fallinn.
Björn Þorvaldsson hjá sérstökum saksóknara, flutti málið fyrir héraðsdómi og Hæstarétti. Hann sagði hins vegar í samtali við Stundina að greinilega væri um misskilning aðræða, í þessu símtali væri klárlega verið að vísa til Ólafs Ólafssonar. Jafnvel þótt svo væri ekki þá bentu önnur gögn á aðkomu Ólafs Ólafssonar. Dómurinn stæði ekki og félli með því. „Málið byggir ekki á þessu eina símtali, því fer fjarri. Það eru önnur símtöl, tölvupóstar, framburðir, margt sem bendir á hans aðkomu í málinu. Það eru nóg af gögnum sem liggja fyrir til að sakfella Ólaf Ólafsson,“ sagði saksóknari.
Dómur féll í febrúar
Hæstiréttur kvað upp dóm í Al-Thani málinu í febrúar. Þar var refsingin yfir Ólafi Ólafssyni þyngd, frá þremur og hálfu ári í Héraðsdómi upp í fjögur og hálft ár. Það sama átti við um dóm yfir Magnúsi Guðmundssyni sem fékk sömu refsingu. Dómur yfir Sigurði Einarssyni var hins vegar mildaður úr fimm árum í fjögur ár og fimm og hálfs árs fangelsisdómur yfir Hreiðari Má staðfestur.
Hér að neðan má sjá rökstuðning fyrir endurupptökubeiðni, en þar segir að Ólafur sé „þess fullviss að endurskoðun á þessum þætti muni leiða til þess að hann verði alfarið sýknaður af kröfum ákæruvaldsins eða að minnsta kosti að refsing hans verði milduð verulega.“
Athugasemdir