Fjölskylda forsetans rakar inn milljörðum eftir embættistökuna

Fjöl­skylda Donalds Trump Banda­ríkja­for­seta hefur hagn­ast um meira en 800 millj­ónir dala, eða tæp­lega 100 millj­arða króna, á sölu sýnd­ar­eigna (crypto) á fyrstu sex mán­uðum árs­ins 2025, sam­kvæmt ítar­legri úttekt Reuters.

Mikill hluti tekna kom frá erlendum aðilum, á sama tíma og synir for­set­ans, Eric Trump og Donald Trump Jr., kynntu fyr­ir­tækið World Liberty Financial (WLF) á fjár­fest­ing­ar­ráð­stefnum í Evrópu, Mið­aust­ur­löndum og Asíu. 

Reuters segir að tekjur Trump-fyr­ir­tækj­anna (Trump Organization) hafi 17-fald­ast eftir emb­ætt­is­töku Trumps. Þær hafi verið 864 millj­ónir dala á fyrri helm­ingi árs­ins 2025, sam­an­borið við 51 milljón á sama tíma­bili í fyrra. Þar er um að ræða raun­veru­legt fjár­flæði, en ef tekið yrði til­lit til hagn­aðar á papp­ír­unum gæti verið um mun hærri fjár­hæðir að ræða.

Af þessu voru 802 millj­ónir dala, eða rúm 90%, tengdar verk­efnum fjöl­skyld­unnar með sýnd­ar­eignir, þar á meðal sölu á WLFI-táknum, sem eru svokölluð stjórn­tákn sem veita rétt á aðild að ákvarð­ana­töku, meðal ann­ars til­lögu­rétt og atkvæða­rétt í World Liberty Financial. Að auki áætlar Reuters að fjöl­skyldan hafi þénað um 336 millj­ónir dala á sölu „meme-mynta“ undir heit­inu $TRUMP. Útreikn­ingar Reuters byggja á opin­berum fjár­hags­upp­lýs­ingum, fast­eigna­gögnum, gögnum úr dóms­málum og við­skipta­gögnum á mark­aði fyrir sýnd­ar­eignir.

Á meðal stærstu ein­stakra við­skipta voru yfir­lýst kaup fyrir 100 millj­ónir dala á WLFI-stjórn­táknum af hálfu sam­tak­anna Aqua1 Foundation í Sam­ein­uðu arab­ísku fursta­dæm­unum 26. júní. Samkvæmt Reuters fær fyr­ir­tæki tengt Trump Organization 75% af tekjum af sölu WLF. 

Reuters greinir frá því að Eric Trump, sonur for­set­ans, hafi í maí hitt kín­verskan við­skipta­mann, Guren „Bobby“ Zhou, í Dubai. Zhou, sem gegnir hlut­verkum í nokkrum fyr­ir­tækjum. Hann er til rann­sóknar í Bret­landi vegna gruns um pen­inga­þvætti, sam­kvæmt bresku National Crime Agency og skjals hjá Royal Courts of Justice. Í yfir­lýs­ingu til Reuters sagð­ist félag að nafni Aqua Labs Invest­ment LLC, sem lýsir Zhou sem stofn­anda, vera Abú Dabí-ein­ing Aqua1 Foundation og að fjár­fest­ing Aqua1 í WLFI hafi verið við­skipta­leg ákvörðun. Eric Trump og Aqua1 Foundation svör­uðu ekki beiðnum Reuters um við­brögð.

Boðuðu vettvang fyrir jafningjalán

Á vef­síðu WLF hefur fyr­ir­tækið kynnt ýmis áform, meðal ann­ars inn­láns­for­rit og lána­þjón­ustu með trygg­ingu í sýnd­ar­eignum, en Reuters segir að aðal­vara félags­ins — vett­vangur fyrir jafn­ingja­lán sem ætti að keppa við hefð­bundna banka — hafi ekki litið dags­ins ljós. Þá segir í umfjöllun Reuters að WLFI-tákn veiti eig­endum tak­mörkuð stjórn­un­ar­rétt­indi, og $TRUMP-myntin sé fyrst og fremst safn­gripur sem end­ur­spegli vin­sældir nafns­ins. 

Lög­fræð­ingur WLF, Timothy Parlatore, sagði í bréfi til Reuters að WLFI-táknin væru ekki verð­bréf heldur „staf­ræn eign með raun­veru­legt nota­gildi,“ og að áætl­anir um virði og tekjur væru „rangar og vill­andi.“ Hann gaf ekki frek­ari tækni­lega útskýr­ingu á ávinn­ingi hand­hafa tákn­anna. 

Fordæmalaus hagsmunaárekstur

Sið­fræð­ingar með áherslu á opin­bera stjórn­sýslu telja sam­spil verk­efna fjöl­skyld­unnar í sýnd­ar­eignum og opin­berrar stöðu for­set­ans til að móta reglur á sviði sýnd­ar­eigna skapa for­dæma­lausan hags­muna­á­rekstur í sam­tíma­sögu Banda­ríkj­anna — þó að ekk­ert stað­festi ólög­mæt fyr­ir­heit um aðgang eða íviln­anir gegn fjár­fest­ingu. „Þetta er lög­legt en ósið­legt,“ sagði Richard Painter, fyrr­ver­andi siða­ráð­gjafi Hvíta húss­ins undir George W. Bush. Hvíta húsið hefur ítrekað hafnað því að hags­muna­á­rekstur sé fyrir hendi og vísað á að for­set­inn hafi sett fyr­ir­tækin í sjóð undir stjórn barna sinna þegar hann tók við emb­ætti. 

Verð WLFI-tákna hefur verið sveiflu­kennt. Eftir að við­skipti hófust 1. sept­em­ber hækk­aði verðið í upp­hafi en lækk­aði síðan skarpt. Reuters greindi í kjöl­farið frá því að hluti tákna stór­kaup­anda, Justin Sun, hefði verið frystur á meðan tak­mark­anir gilda um end­ur­sölu stofn­fjár­festa.

Flestir erlendir

Reuters segir að stór hluti fjár­fest­anna sé erlendur. Greining Nansen fyrir Reuters á 50 stærstu veskj­unum með sýnd­ar­eign­irnar 15. sept­em­ber benti til þess að 36 þeirra væru lík­lega tengd erlendum kaup­endum.

Banda­rísk veskjaeign var að mestu bundin við Nasdaq-skráða Alt5 Sigma, sem safn­aði fjár­magni til að kaupa um 7,5% af heild­ar­fram­boði WLFI-tákna, en sú aðgerð skil­aði Trump-fjöl­skyld­unni veru­legu reiðufé, óháð þróun hluta­bréfa Alt5 eftir á.