Lögreglumenn drógu mótmælendur út úr innanríkisráðuneytinu fyrr í dag þegar þeir kröfðust þess að hitta Ólöfu Nordal ráðherra vegna brottflutnings Eze Okafor úr landi eftir fjögurra ára búsetu á Íslandi. Atburðinn má sjá á myndbandi neðar í fréttinni.

„Það er bara verið að gera allt til þess að fá Ólöfu [Nordal] til þess að gangast við þeirri ábyrgð sem hennar embætti á að bera og að hún feli sig ekki endalaust á bak við stofnanir sem heyra undir hennar embætti,“ segir Hjalti Hrafn Hafþórsson, heimspekingur og talsmaður No Borders, í samtali við Stundina.

Meðlimir samtakanna og ýmsir aðrir mótmæltu brottvísun hælisleitandans Eze Okafor til Svíþjóðar harðlega í ráðuneytinu í dag. Hermann Sæmundsson, skrifstofustjóri hjá innanríkisráðuneytinu, ræddi við mótmælendur og tók við kröfum þeirra eins og sjá má á meðfylgjandi myndbandi.

„Bring back Eze!“

Þeir stuðningsmenn Eze sem Stundin hefur rætt við eru óánægðir með viðbragðaleysi innanríkisráðuneytisins í málinu og það sem þau kalla algjöra þögn Ólafar Nordal innanríkisráðherra. „Við teljum mjög mikilvægt að hún fái ekki að fara í gegnum þetta allt saman í einhverri þögn og varpi síðan allri ábyrgð yfir á Útlendingastofnun,“ segir Hjalti Hrafn í samtali við Stundina. „Það hefur verið hennar háttur hingað til, hún bara lætur ekkert í sér heyra um mál, vill ekkert tala við neinn um þessi mál og þykist svo ekki bera neina ábyrgð á þeim,“ segir Hjalti og bætir við: „Hún verður bara að gjöra svo vel að gera það í þetta skipti.“

Sjá einnig: Hrópaði á Jesú meðan hann var tekinn lögreglutaki

Í óeirðargallanum Lögreglumenn stóðu vaktina í óeirðargallanum eins og sjá má á þessari mynd.

„Hún bara lætur ekkert í sér heyra um mál, vill ekkert tala við neinn um þessi mál og þykist svo ekki bera neina ábyrgð á þeim“

Talið er að um sextíu manns hafi mótmælt þegar mest var. Mótmælendur hrópuðu ýmis slagorð, meðal annars „Bring back Eze!“ en það hefur orðið að einskonar slagorði þeirrar hreyfingar sem virðist vera að myndast í kring um málið. Mótmælin þróuðust síðar yfir í setuverkfall þar sem mótmælendur tóku sér sæti í anddyri ráðuneytisins og kröfðust þess að fá að ræða við ráðherra. Setuverkfallið stóð yfir þar til skrifstofum innanríkisráðuneytisins var lokað klukkan fjögur. Þá tóku lögreglumenn í óeirðarbúningum til við að hreinsa anddyri ráðuneytisins með því að draga fólk út með valdi og henda því út líkt og sést á meðfylgjandi myndbandi sem Stundin birtir.

Þögul mótmæli á þingpöllum

Eze hefur verið gert að yfirgefa Svíþjóð ekki síðar en á morgun, miðvikudaginn 1. júní, en öll rök íslenskra yfirvalda byggja á því að Svíþjóð taki við honum og þar fái hann réttláta málsmeðferð. Eze óttast um líf sitt verði hann sendur aftur til Nígeríu en hann flúði þaðan árið 2011 eftir að liðsmenn Boko Haram höfðu ráðist á hann og drepið bróður hans í borginni Maiduguri í norð-austurhluta Nígeríu. „Þetta er bara spurning um einhverjar klukkustundir,“ segir Hjalti Hrafn sem bendir á að baráttan sem standi nú yfir geti hreinlega snúist um líf eða dauða Eze. Þetta sé ein ástæða þess að einhverjir hafi haldið mótmælunum áfram fyrir utan Alþingishúsið og farið upp á þingpalla.

Sjá einnig: Handtekinn, fluttur úr landi án fyrirvara og beittur ofbeldi þegar hann mótmælti

Spiluðu tónlist Einhverjir mótmælendur spiluðu tónlist á meðan á mótmælunum stóð.

„Eftir að okkur var hent út úr ráðuneytinu með með valdi fórum við á þingpalla,“ segir Jórunn Edda Helgadóttir, önnur þeirra kvenna sem handteknar voru í flugvél Icelandair þegar þær mótmæltu brottvísuninni, í samtali við Stundina. „Þar sátum við í þögn í rúman klukkutíma, eða þangað til klukkan 18:00 þegar atkvæðagreiðsla var að hefjast og þingmenn fóru að týnast í salinn. Þá stóðum við upp saman og gengum út eftir að eitt okkar hafði óskað þess við salinn að þingmenn myndu nýta fyrirspurnartíma á morgun til þess að spyrjast fyrir um vinnubrögð Útlendingastofnunar í máli Eze Okafor.“

Vinur Eze talar um dauðadóm

Reykjavik Grapevine fjallar um málið en þar er haft eftir vini Eze, sem er einnig frá Nígeríu að Eze bíði dauðadómur í Nígeríu. „Eze er að horfa fram á dauðarefsingu,“ sagði hann í anddyri innanríkisráðuneytisins. „Hann verður færður í hendur Boko Haram þegar hann kemur aftur til Nígeríu. Það er enginn friður í Nígeríu. Ég biðla til íslenskra stjórnvalda að koma með hann aftur hingað. Hann á ekki í útistöðum við neinn hér,“ sagði vinurinn sem líkti brottvísuninni við það dauðadóm.

Færð út með valdi Mótmælendur sem höfðu tekið þátt í setuverkfalli voru teknir með valdi út úr anddyri ráðuneytisins.

„Það er margoft búið að reyna að ná tali af innanríkisráðherra, hún hefur ávallt neitað“

Sem fyrr segir stóð Hermann Sæmundsson, skrifstofustjóri hjá innanríkisráðuneytinu, fyrir svörum og ræddi við mótmælendur fyrir hönd ráðuneytis og ráðherra. „Það er margoft búið að reyna að ná tali af innanríkisráðherra, hún hefur ávallt neitað,“ sagði einn mótmælenda í samtali við skrifstofustjórann fyrr í dag.

„Nú hef ég tekið við ykkar boðskap,“ svaraði Hermann en stuðningsmaður Eze greip fram í: „Já, það er ekki í fyrsta skiptið sem það hefur verið tekið á móti okkar boðskap og það eru aldrei nein svör eða úrræði. Við erum búin að fá leið á þessu.“

Þá var Hermann spurður hvort hann hefði einhver skilaboð frá Ólöfu og hann svaraði því neitandi. Jórunn Edda Helgadóttir, önnur þeirra kvenna sem handteknar voru í flugvél Icelandair þegar þær mótmæltu brottvísuninni, sagði að mótmælendur vildu eindregið hitta Ólöfu Nordal sjálfa þar sem skilaboð á milli mótmælenda og ráðherra, í gegnum hvers kyns milliliði, virtust sífellt fara forgörðum.

Rúmlega 1600 skora á Ólöfu

Óttast um líf sitt Eze Okafor, hælisleitandi frá Nígeríu, var sendur út landi í síðustu viku. Hann óttast um líf sitt verði hann sendur aftur til Nígeríu líkt og sænsk yfirvöld fyrirhuga.

Mál Eze Okafor hefur vakið mikla athygli og verið mikið til umfjöllunar fjölmiðla síðustu daga. Bent hefur verið á að með henni sé Útlendingastofnuna að fara gegn fyrirmælum æðra stjórnvalds, kærunefndar útlendingamála.

„Úrskurði kærunefndar verður ekki hnekkt af Útlendingastofnun sem er lægra sett stjórnvald, það brýtur gegn íslenskri stjórnskipan,“ sagði Katrín Theódórsdóttir, lögmaður Eze, í samtali við Stundina á miðvikudag. Útlendingastofnun hefur hafnað þessu og sakar Katrínu sem og fjölmiðla um rangfærslur, í tilkynningu á heimasíðu sinni. Er það álit stofnunarinnar að í úrskurðinum sé Eze einungis leiðbeint um að afla upplýsinga hjá Útlendingastofnun um það hvort fresturinn sé liðinn.

Það vakti mikla athygli þegar tvær konur mótmæltu brottvísun Eze í flugvél Icelandair með eftirminnilegum hætti. Hópur fólks hefur nú tekið sig saman og hafið söfnun til styrktar konunum tveimur, þeim Ragnheiði Freyju Kristínardóttur og Jórunni Eddu Helgadóttur, á söfnunarsíðunni Indiegogo. Þar segir að þær geti átt von á kostnaðarsömum réttarhöldum en í kæru sem lögregla hefur kynnt þeim og hyggst leggja fram í fjórum liðum er gefið til kynna að þær hafi reynt að taka stjórn flugvélarinnar. Refsiramminn fyrir þá grein felur í sér tveggja ára fangelsisdóm, hið minnsta.

Sjá einnig: Handteknar í flugvél: Þeir voru að leika sér að því að meiða mig

Mótmælendur ávörpuðu þingmenn í þingsal kl. 18:00 í kvöld, að því er fram kemur í tilkynningu sem No Borders samtökin og Vinir Eze, sendu frá sér nú í kvöld. „Lagaleg staða Eze í Svíþjóð er sú að honum hefur verið neitað um málsmeðferð og sagt að hann verði sendur beint til Nígeríu við það fyrsta. Þetta undirstrikar ábyrgð íslenskra stjórnvalda þar sem mannréttindalög, þar á meðal Flóttamannasáttmáli Sameinuðu þjóðanna, Mannréttindasáttmála Evrópu auk Samnings S.Þ. um pyntingar, kveða skýrt á um að ekki megi vísa einstakling til baka þangað sem líf einstaklings er ótryggt,“ segir í tilkynningunni. Þá undirstrika vinir Eze og No Borders Iceland  kröfu sína um að brottvísun verði dregin til baka og málsmeðferð Eze verði skoðuð.

1600 manns hafa skrifað undir áskorun á vefnum change.org þess efnis að Ólöf Nordal innanríkisráðherra beiti sér fyrir því að Eze Okafor fái að koma aftur til landsins.