Illugi Gunn­ars­son mennta­mála­ráð­herra opin­ber­aði skatt­fram­tal sitt og eig­in­konu sinnar á Facebook-síðu sinni í gær og sagð­ist með því svara frétt Stund­ar­innar um greiðslu frá Orku Energy til einka­hluta­fé­lags hans, sem barst árið eftir að hann hóf störf á Alþingi að nýju. Skatt­fram­talið svarar hins vegar ekki efni fréttar Stund­ar­innar, enda birt­ast greiðslur til einka­hluta­fé­laga ekki á skatt­fram­tali ein­stak­linga, eins og þekkt er.

Frétt Stund­ar­innar í gær fjall­aði um greiðslu Orku Energy til fyr­ir­tækis hans, OG Capital ehf., árið 2012. Tilefni frétt­ar­innar var að greiðslan barst löngu eftir að Illugi sett­ist á þing og svo að greiðslan virð­ist sam­ræm­ast illa yfir­lýs­ingum Illuga um að greiðslur til hans tak­markist við 5,6 millj­óna króna launa­greiðslur á meðan hann tók sér hlé frá þing­störfum.

Enn er hins vegar mörgum spurn­ingum ósvarað, enda svarar Illugi ekki spurn­ingum Stund­ar­innar um hags­muna­tengsl hans við Orku Energy í þeim 16 til­fellum sem þær hafa verið sendar á hann eða aðstoð­ar­menn hans í tölvu­pósti.

Orðrétt segir í færslu Illuga: „Vegna fréttar Stund­ar­innar frá því í dag, sem byggð er á ónafn­greindum heim­ild­ar­manni, hef ég ákveðið að stíga það skref að birta upp­lýs­ingar úr skatt­fram­tali okkar Bryn­hildar vegna árs­ins 2012 og árs­ins 2013.“ Illugi birtir svo skatt­fram­tal sitt fyrir þessi ár jafn­vel þó það teng­ist efni frétt­ar­innar ekki beint, þar sem skatt­fram­töl ein­stak­linga sýna ekki greiðslur til einka­hluta­fé­laga í þeirra eigu. Umrædd greiðsla birt­ist hins vegar í árs­reikn­ingi einka­hluta­fé­lags hans, en laga­skylda er til birt­ingar árs­reikn­inga.

Greiðsla til OG Capital - ekki Illuga persónulega

Í frétt Stund­ar­innar kemur hins vegar fram að 1,2 millj­óna greiðslan frá Orku Energy hafi orðið eftir inni í OG Capital og því ekki verið greidd út sem laun til Illuga árið 2012. Illugi lét OG Capital hins vegar end­ur­greiða sér rúm­lega 400 þús­und króna lán sem hann hafði veitt því. Þá greiddi OG Capital tekju­skatt sem tekj­unum sem félagið fékk eins og segir í árs­reikn­ingi þess: „Reikn­aður tekju­skattur til greiðslu á árinu 2013 vegna rekstr­ar­árs­ins 2012 nemur kr. 104.335.“ 

Þar af leið­andi er strax ljóst að í frétt­inni er ekki fjallað um launa­greiðslur til Illuga per­sónu­lega árið 2012. Fréttin fjallar hins vegar um greiðslur Orku Energy til ráð­gjaf­ar­fyr­ir­tækis Illuga árið 2012 vegna vinnu sem hann vann í gegnum eign­ar­halds­fé­lagið fyrir Orku Energy. Með öðrum orðum: Illugi tók þessa greiðslu ekki út úr eign­ar­halds­fé­lagi sínu sem laun árið 2012. Þar af leið­andi er ekk­ert um greiðsl­una á hans per­sónu­lega skatt­fram­tali en greiðslan kemur fram í árs­reikn­ingi OG Capital.

„Skatt­fram­töl okkar eru unnin af lög­giltum end­ur­skoð­anda.“

Skattframtöl málinu óviðkomandi

Allt sem á eftir flýtur í færslu Illuga er því einnig mál­inu óvið­kom­andi og skatt­fram­töl hans sjálfs hafa ekk­ert með frétt Stund­ar­innar að gera. Engu að síður kýs Illugi að færa umræð­una yfir á skatt­fram­töl sín: „Skatt­fram­töl okkar eru unnin af lög­giltum end­ur­skoð­anda. Þar koma launa­greiðslur til okkar hjóna fram og þar sést að árið 2012 fæ ég laun frá Orku Energy upp á kr. 5.621.179 eins og ég hafði áður greint frá og sýnt launa­seðil fyrir. Engar launa­greiðslur, arð­greiðslur eða aðrar greiðslur eru til mín eða konu minnar frá fyr­ir­tæk­inu OG Capital á árinu 2012 eða á árinu 2013. Á árinu 2013 fór félagið úr minni eigu.“

„Þetta er eina greiðslan sem ég hef fengið frá þessu fyr­ir­tæki“

Orka Energy greiddi meira vegna vinnu Illuga

Skatt­fram­tal Illuga fyrir árið 2012 sýndi fram á 5,6 millj­óna launa­greiðsl­una til hans Orku Energy sem fjallað hefur verið um og að sú greiðsla hafi borist honum 2012 og verið á skatt­fram­tali hans það ár. Eðlilega var greiðslan til OG Capital ehf. ekki á skatt­fram­tali Illuga þar sem greiðslan var til fyr­ir­tækis hans en ekki hans per­sónu­lega og var ekki greidd út til hans í formi launa.

Frétt Stund­ar­innar fjall­aði hins vegar um greiðslu Orku Energy til OG Capital árið 2012 sem einnig var vegna vinnu Illuga fyrir Orku Energy. Greiðslur frá Orku Energy vegna ráð­gjaf­ar­vinnu Illuga Gunn­ars­sonar námu því hins vegar meira en 5,6 millj­ónum króna. Illugi hefur hins vegar sagt að hann hafi ekki fengið meira greitt frá Orku Energy en þessar 5,6 millj­ónir. „Þetta er eina greiðslan sem ég hef fengið frá þessu fyr­ir­tæki,“ sagði hann við RÚV um helg­ina. Tekið skal að Illugi hag­aði orðum sínum þannig að skilja má að hann hafi ein­göngu verið að vísa til greiðslna til sín per­sónu­lega en ekki til fyr­ir­tækis í sinni eigu.

Athygli vekur einnig að Illugi birtir ekki skatt­fram­tal sitt fyrir árið 2011 en á því fram­tali koma vænt­an­lega fram laun sem hann greiddi sér út úr OG Capital ehf. það ár en ekki er vitað hvaðan þær launa­greiðslur bár­ust inn í fyr­ir­tækið.

Spurningum ósvarað um hagsmunatengsl

Stundin sendi Illuga spurn­ingu um greiðslu frá Orku Energy til OG Capital ehf. í gær en hann hefur ekki svarað hennni og svarar henni heldur ekki í færslu sinni á Facebook.

Þrátt fyrir að umrædd við­bót­ar­greiðsla frá Orku Energy, sem Illugi til­greindi ekki, hafi borist til einka­hluta­fé­lags Illuga, en ekki milli­liða­laust til hans per­sónu­lega, kom greiðslan Illuga til góða. Hversu mikið til góða er hins vegar ekki vitað. Einka­hluta­fé­lagið greiddi Illuga síðan lán sem það hafði fengið hjá honum upp á 400 þús­und krónur. Þá greiddi félagið kostnað fyrir rúm­lega 100 þús­und krónur. Auk þess keypti vinur Illuga, stjórn­ar­for­maður Orku Energy, einka­hluta­fé­lagið af honum, sam­hliða því að hann keypti íbúð Illuga. Gera má ráð fyrir því að greiðslan sem barst einka­hluta­fé­lagi Illuga hafi birst í virði félags­ins þegar það var keypt, nema Illugi hafi tekið á sig að lækka verðið niður fyrir raun­virði.