Hversdagsleikinn er hulduefnið

Björg Svein­björns­dóttir hélt til Ísa­fjarðar fyrir tveimur árum til að kynna bók sína, Hljóðin úr eld­hús­inu, og í þeirri ferð ákvað hún að flytja vestur. Nú hefur hún, ásamt vin­konu sinni, Vaida Bražiūnaitė, opnað Skó­búð­ina, hvers­dags­safn og verslun sem selur list og hönnun fólks sem ýmist býr á Ísafirði eða teng­ist svæð­inu. Hver er hug­myndin að baki þessu fram­taki?

„Skóbúðin er bæði safn og verslun, safnið köllum við hvers­dags­safnið, museum mundane, eins og það heitir á ensku, og við vinnum með sögur úr hvers­deg­inum. Við hittum sem sagt fólk af svæð­inu og flettum í gegnum fjöl­skyldu­albúm með því og fáum að heyra alls konar sögur og minn­ingar. Svo fáum við lán­aðar ljós­mynd­irnar, skönnum inn og setjum upp með sög­unni eða minn­ing­unni. Sýningin sem við erum með uppi núna eru sögur og ljós­myndir inni í gömlum bókum sem bóka­safnið var að losa sig við.“