Eignarhaldsfélagið Óskabein ehf., sem meðal annars er í eigu fjárfestanna Andra Gunnarssonar og Gests Breiðfjörðs Gestssonar, gæti fengið um 1/5 af kaupverði hlutabréfanna í Vátryggingarfélagi Íslands til baka ef tryggingafélagið greiðir út fimm milljarða króna arð til hluthafa þess eins og stjórn fyrirtækisins ætlar að gera. Óskabein keypti ríflega 5,5 prósenta hlut í VÍS í nóvember síðastliðnum og var samningurinn um kaupin undirritaður í lok október þegar gengi bréfa í VÍS var hærra en það hafði verið mánuðina á undan og eins mánuðina á eftir. Kaupverð bréfanna miðað við gengið í VÍS þann 28. október var rúmlega 1.261 milljónir króna.