Suma daga er líkt og vorið sé alveg á næsta leiti. Sólargeislarnir gægjast inn um gluggana, fuglasöngur ómar í fjarlægð og sundlaugarnar fyllast af fólki. En síðan, líkt og hendi væri veifað, kemur næsta vetrarlægð. Næsta hret. Veðrið hefur óneitanlega áhrif á andlega líðan fólks og flestir Íslendingar eru fyrir löngu orðnir langeygir eftir betri tíð. Á meðan við bíðum er hins vegar ýmislegt sem við getum gert til þess að lífga upp á gráu dagana og á vefsíðunni happier.com eru nokkrar hugmyndir sem heimfæra má á íslenskan veruleika.
1. Farðu út!
Í stað þess að hírast innandyra í hvert skipti sem kalt er í veðri, rigning eða snjókoma, gæti verið hressandi að klæða sig í hlífðargallann og fara út. Sem dæmi væri hægt að fara í kröftuga göngu um hverfið, út að hoppa í polla með börnunum eða setjast út á verönd með kaffibollann, húfuna og vettlingana.
2. Finndu hamingjuna í litunum
Það má lífga upp á grámann í tilverunni með því að klæðast líflegum litum. Hvort sem það er litríkur trefill, skært naglalakk eða röndóttir sokkar þá eru líkur á að litirnir munu fá þig og þá sem eru í kringum þig til þess að brosa.
Athugasemdir