Hafliði Helgason hefur verið ráðinn ritstjóri efnahags- og viðskiptafrétta hjá fréttastofu 365. Þetta kemur fram í frétt á Vísi.is en Hafliði starfaði á Fréttablaðinu frá 2001 til 2007 og var fyrsti ritstjóri Markaðarins, fylgirits Fréttablaðsins um viðskipti. Mun hann nú aftur annast ritstjórn fylgiritsins líkt og hann gerði á útrásarárunum en þá sætti hann gagnrýni fyrir þann mikla stuðning sem blaðið veitti íslensku fjármálalífi.
Hafliði hætti á Fréttablaðinu árið 2007 og tók til starfa hjá Reykjavik Energy Invest þar sem hann fékk að kaupa hlutabréf á vildarkjörum fáeinum vikum eftir ráðninguna. Að því er fram kemur á Vísi.is hefur Hafliði unnið að ýmsum verkefnum tengdum fjárfestingum undanfarin ár, nú síðast sem sérfræðingur hjá Framtakssjóði Íslands frá árinu 2012. Hann er með MBA-gráðu frá Háskólanum í Reykjavík og á að baki nám í blaðamennsku í Svíþjóð og heimspeki við Háskóla Íslands.
Í bókinni Hamskiptin: Þegar allt varð falt á Íslandi eftir Inga Frey Vilhjálmsson, blaðamann á Fréttatímanum, er rakið hvernig Hafliði gætti hagsmuna viðskiptalífsins sem ritstjóri Markaðarins hjá 365 miðlum. „Ég starfaði á Fréttablaðinu á þessum tíma og man vel eftir því hvernig hann reyndi ítrekað að koma í veg fyrir að aðrir blaðamenn en þeir sem störfuðu á Markaðnum skrifuðu um íslensk fyrirtæki og útrásina með rökum eins og þeim að gagnrýnin og aðgangshörð skrif gætu eyðilagt tengsl viðskiptablaðsins við viðkomandi fyrirtæki og fleira í þeim dúr,“ segir í bókinni. „Þannig var reynt að koma í veg fyrir umfjöllun annarra blaðamanna um viðskiptalífið með því að slá á puttana á þeim.“
Fjölmiðlamál
Öll stærri einkarekin fjölmiðlafyrirtæki rekin með tapi fyrir greiðslu fjölmiðlastyrkja
Hundruð milljóna taprekstur fjölmiðla telst ekki til fjárhagserfiðleika
Kolbrún og Kristín óska eftir rökstuðningi frá RÚV
Tengja uppsagnir hjá Morgunblaðinu við kjarabaráttu: „Þér kemur einfaldlega ekkert við hvað ég er með í laun“
Eyþór Arnalds: „Ósæmilegt að segja að Samherji sé einhvers konar mútufélag“
Athugasemdir