Innan skamms mun HS Orka hefja rannsóknarboranir í Eldvörpum, skammt vestan við Bláa lónið og Svartsengi en þar er að finna gosminjar frá Reykjaneseldum á 13. öld. Fjölmargir náttúruverndarsinnar og útivistarfólk hafa sett sig upp á móti þessu framkvæmdum og hefur ljósmyndarinn Ellert Grétarsson verið einn þeirra en hann hefur skrifað fjölmarga pistla um málið. Eldvörp er röð gosgíga sem teygja sig 10 kílómetra frá norðaustri til suðvesturs eftir sprungustefnunni sem Ellert segir einkenna eldstöðvarnar á vestanverðum Reykjanesskaganum.
Þá segir Ellert einnig að allar líkur séu á því að orkuvinnsla á svæðinu verði ekki sjálfbær: „Í matskýrslunni kemur glögglega fram að tengsl eru á milli hitasvæðanna í Eldvörpum og Svartsengi. Allt bendir til þess að um sama jarðhitageyminn sé að ræða. Orkuvinnsla í Eldvörpum yrði því aldrei sjáflbær, ekki frekar en vinnslan í Svartsengi sem er keyrð á rúmlega 70% afköstum. Einungis þannig er mögulegt að halda henni í jafnvægi. HS Orka vill sumsé ganga úr skugga um þetta með tilraunaborunum.“
Bæjaryfirvöld í Grindavík gáfu grænt ljós á verkefnið en í ljósi þeirrar umræðu sem átt hefur sér stað varðandi fyrirhugaðar framkvæmdir þá fundaði Umhverfis- og ferðamálanefnd Grindavíkur um málið. Nefndin segir að gera megi ráð fyrir því að aukin umræða um Eldvörp leiði til aukinnar umferðar ferðamanna um svæðið.
„Svæðið er mjög viðkvæmt og því brýnt að þegar verði hafist handa við að skipuleggja stígagerð og gera aðrar þær ráðstafanir til að stýra umferð fólks um svæðið. Nefndin leggur til að leitað verði ráðgjafar hjá Ómari Smára Ármannssyni, sem hefur kynnt sér svæðið manna best.“
Þá vildi nefndin einnig árétta mikilvægi þess að aðilar á vegum Grindavíkurbæjar hafi mjög náið eftirlit með öllum framkvæmdum á svæðinu: „… og fylgi því eftir að allar takmarkanir á umfangi borteiga séu virtar.“
Þá segir einnig í bókun nefndarinnar að strangt eftirlit verði haft með þeim framkvæmdum sem óhjákvæmilega verða vegna uppbyggingar og styrkingar á vegum og slóðum á svæðinu.
Eldvörp
Athugasemdir