Rannsókn hefur stað­fest að konan, sem fannst látin við Sel­vogs­vita á sunnu­dag, er Birna Brjáns­dóttir. Þá hefur krufn­ing aust­ur­rísks rétt­ar­meina­fræð­ings leitt í ljós að Birnu var ráð­inn bani.

Þetta stað­festir Grímur Grímsson, yfir­lög­reglu­þjónn hjá lög­regl­unni á höf­uð­borg­ar­svæð­inu, í sam­tali við frétta­stofu RÚV í morgun.

Þar segir Grímur að lög­regla muni ekki greina frekar frá nið­ur­stöðu krufn­ingar fyrr en stað­fest skýrsla rétt­ar­meina­fræð­ings liggur fyrir og hugs­an­legt sé að það verði ekki fyrr en eftir helgi. Þá hafi rauði Kia Rio-bíla­leigu­bíll­inn verið mikið rann­sak­aður og sé enn í rann­sókn hjá tækni­deild lög­regl­unnar.

Lögreglan rannsakar samskipti

Eins og fram hefur komið í fréttum hefur lög­regla stað­fest að blóð sem fannst í bílnum sé Birnu. Lögregla veit hins vegar ekki hvar bíll­inn var þegar ráð­ist var á Birnu eða hvenær. Menn­irnir tveir neita báðir sök.

Líkt og Stundin greindi frá í gær reyndi annar sak­born­ing­anna, sem situr í gæslu­varð­haldi á Litla-Hrauni grun­aður um aðild að and­láti Birnu, Nikolaj Olsen, ítrekað að ná sam­bandi við íslenska vin­konu sína aðfara­nótt laug­ar­dags­ins 14. jan­úar. Sum þeirra áttu sér stað á sama tíma og talið er að Birna hafi verið í rauða Kia Rio-bíla­leigu­bílnum. Grímur segir lög­reglu nú vera að rann­saka þessar upp­lýs­ingar.

Þá ræddi Nikolaj við þessa sömu vin­konu sína eftir að talið er að Birnu hafi verið ráð­inn bani.

Reyndi að hringja níu sinnum

„Hann reyndi að hringja í mig níu sinnum þessa nótt og síð­asta sím­talið var klukkan 11:55 á laug­ar­deg­inum. Þetta voru allt sím­töl í gegnum Facebook. Ég vakna þarna rétt eftir hádegi á laug­ar­deg­inum og segi honum að ég hafi verið með kærasta mínum og hafi ekki getað svarað honum. Ég tal­aði við hann í gegnum Snapchat. Hann sendi mér strax til baka og sagði að hann væri þunnur. Ég spurði hann hvort það væri ekki allt í lagi, þar sem hann hafi hringt svo oft. Hann sagði að allt væri í lagi og að þeir myndu vænt­an­lega sigla frá höfn þarna síðar um kvöldið. Við spjöll­uðum aðeins lengur saman og það var ekk­ert í sam­skiptum okkar sem mér fannst eitt­hvað skrítið eða und­ar­legt,“ sagði María Kára­dóttir sem Stundin ræddi við í gær.

Eftir að Polar Nanoq var nefndur í fjöl­miðlum í tengslum við hvarf Birnu Brjáns­dóttur náði María ekki sam­bandi við Nikolaj. „Þegar málið kemur síðan í fjöl­miðla og það er tengt við þennan tog­ara þá fer ég að reyna að hafa sam­band við Nikolaj og ég næ því ekki. Ég og önnur vin­kona hans förum að ræða þetta og þá sýnir hún mér mynd af Thomasi og þá næ ég að bera kennsl á hann. Að þetta sé sá sem kom og hitti Nikolaj þetta kvöld,“ sagði María sem loks­ins náði sam­bandi við Nikolaj á þriðju­deg­inum 17. jan­úar.

„Það var síðan þriðju­dags­kvöldið sem að ég sendi honum skila­boð og nokkrum mín­útum seinna fékk ég svar. Ég sendi Nikolaj á Facebook og spurði hann hvort hann væri búinn að jafna sig á þynn­kunni. Hann sagð­ist vera góður, á veiðum en á leið til Íslands. Þá sagði hann að það væru vand­ræði með þráð­lausa netið um borð. Ég spurði hann að því hvort hann hefði kom­ist heilu og höldnu um borð í togar­ann þetta kvöld. Ég fékk ekk­ert svar. Meira veit ég ekki um málið.“

Stundin greindi lög­reglu frá atburða­rásinni sem um ræðir fyrir birt­ingu frétt­ar­innar í gær. Þá hafði María einnig haft sam­band við lög­reglu og sent upp­lýs­ingar til hennar. Lög­reglan rann­sakar nú þessi sam­skipti.

Kia Rio Blóð úr Birnu fannst í þessum rauða Kia Rio-bíla­leigu­bíl.

Ók um grýttan veg

Lög­reglan hefur biðlað til öku­manna sem eru með upp­töku­vélar í bif­reiðum sínum að skoða hvort rauði Kia Rio-bíla­leigu­bíll­inn sjá­ist í mynd milli klukkan 07:00 og 11:30 laug­ar­dags­morg­un­inn 14. jan­úar.

Lög­reglan reynir nú að kort­leggja ferðir bif­reið­ar­innar frá því hún stöðvast við Hafn­ar­fjarð­ar­höfn rétt eftir klukkan sex, laug­ar­dags­morg­un­inn 14. jan­úar. Samkvæmt frétta­flutn­ingi sást annar mað­ur­inn ganga um borð í togar­ann en hinn ók á brott. Þá hefur lög­reglan greint frá því að ummerki á bíla­leigu­bílnum gefa til kynna að honum hafi verið ekið um grýttan veg.

Þeir sem hafa upp­lýs­ingar um málið eru hvattir til að hafa sam­band við lög­reglu í síma 444 1000.