Bónusgreiðslur upp á 3,4 milljarða króna verða greiddar út til á milli 20 og 30 starfsmanna eignaumsýslufélagsins ALMC, áður Straums-Burðaráss. DV greinir frá þessu í dag. Bónusarnir eru fyrir umsýslu með eignir ALMC. Meðal þeirra sem fá bónusana eru núverandi stjórnarmenn ALMC og fyrrverandi og núverandi starfsmenn fjárfestingarbankans Straums, meðal annars núverandi forstjóri hans Jakob Ásmundsson og fyrrverandi forstjóri, Óttar Pálsson, sem jafnframt er stjórnarmaður í ALMC í dag.

Helsti eigandi ALMC er félagið Thingvellir B.V. sem stýrt af Deutsche Bank í Amsterdam. Ekki liggur fyrir hver á það félag en bandaríski vogunarsjóðurinn Davidson Kempner hefur verið nefndur til sögunnar sem einn af stærri hluthöfunum. 

Ákveðið 2011

Í ásreikningi ALMC fyrir árið 2014 eru 22,831 milljónir evra bókfærðar undir skýringunni „langtíma hvatakerfi“. Í texta sem fylgir skýringunni er rakið hvernig hvatakerfið var ákveðið á hluthafafundi ALMC árið 2011. Þar segir: „Fyrirtækið ákvað hvatakerfi til langs tíma árið 2011, eftir að aðalfundur hluthafa fyrirtækisins heimilaði það. Markmið hvatakerfisins endurheimtur skiptanlegra skuldabréfa með því að hvetja og halda í lykilstjórnendur og starfsmenn.“

Tveimur árum áður, síðsumars 2009, kom fram í fjölmiðlum að Straumur ætlaði að greiða lykilstjórnendum sínum milljarða króna í bónusa fyrir umsýslu með eignir bankans. Þá var talað um að bónusarnir gætu orðið allt að tíu milljarðar króna. Mikil umræða skapaðist um það mál í fjölmiðlum. 

Forstjórinn fær bónusa Núverandi forstjóri fjárfestingarbankans Straums, Jakob Ásmundsson, er einn þeirra sem fær bónus samkvæmt kaupaukakerfinu. Hann var áður fjármálastjóri ALMC. Fleiri starfsmenn Straums fá bónusa frá ALMC en einhverjir þeirra hafa einnig unnið fyrir AlMC.

Mynd: PressPhotos

Baðst afsökunar

Eftir að málið komst í hámæli í fjölmiðlum árið 2009 skrifaði þáverandi forstjóri Straums, Óttar Pálsson, aðsenda grein í Morgunblaðið og baðst afsökunar á hugmyndinni. Hann sagði að hugmyndin hefði ekki tekið mið af íslenskum aðstæðum.

„Sem starfandi forstjóri félagsins ber ég hins vegar ríka ábyrgð á því sem frá félaginu kemur og biðst afsökunar“

Orðrétt kom fram í grein Óttars: „Í ljósi þeirrar umræðu sem átt hefur sér stað undanfarna daga er ég ekki í nokkrum vafa um að ég og aðrir sem að endurskipulagningunni koma hefðum átt að gefa aðstæðum hér á landi betri gaum. Ég tel einnig mikilvægt að fram komi að aldrei hefur staðið til að ég verði þátttakandi í eignaumsýslu Straums að endurskipulagningu lokinni og hef ég því engra persónulegra hagsmuna að gæta í tengslum við launafyrirkomulag þeirrar starfsemi. Sem starfandi forstjóri félagsins ber ég hins vegar ríka ábyrgð á því sem frá félaginu kemur og biðst afsökunar, fyrir eigin hönd og félagsins, á að þær forsendur sem áætlanir mínar og annarra stjórnenda voru reistar á hafi einblínt um of á erlendar aðstæður og ekki verið í nægjanlegum tengslum við þann veruleika sem við Íslendingar búum nú við sem þjóð. Framhald málsins verður í höndum nýrrar stjórnar og nýrra eigenda bankans. Það er þeirra að meta hvernig hagsmunir þeirra verða best tryggðir.“

Hugmyndin aftur á kortið

Hugmyndin um bónusgreiðslurnar komst hins vegar aftur á kortið tveimur árum síðar þrátt fyrir umrædda afsökunarbeiðni fyrir hönd Straums. Nú er hins vegar sama félag, það er að segja sama kennitalan, búið að ákveða slíkar bónusgreiðslur sem byggja á nokkurn veginn sömu forsendum og hvatakerfið sem greint var frá árið 2009.

Viðbrögðin við bónusgreiðslunum eru hins vegar hörð í dag, að minnsta kosti að hluta til á samfélagsmiðlum. Meðal þeirra sem leggja orð í belg er fjölmiðlamaðurinn Illugi Jökulsson segir orðrétt: „Er ekki hægt að gera þetta lið útlægt? Það virðist hvort sem er búa í öðrum heimi en við hér.“

Miðað við afsökunarbeiðni Óttars árið 2009 þá telja hluthafar og aðstandendur ALMC að bónusgreiðslurnar feli ekki í sér rangt veruleikamat árið 2014 líkt og gilti fyrir fimm árum.