1Samsæriskenningarnar
Eftir yfirlýsingar Sigmundar um leyniskýrslur og sálgreiningar erlendra kröfuhafa á íslenskum einstaklingum kom í ljós að veruleikinn var ekki jafn ævintýralegur og hann gaf til kynna. „...Reglulega eru skrifaðar leyniskýrslur hérlendis fyrir kröfuhafana… Og í sumum tilvikum hafa verið gerðar sálgreiningar á fólki til að átta sig á því hvernig best sé að eiga við það,“ sagði Sigmundur. Fullyrðing hans um að í leyniskýrslu hafi komið fram sú niðurstaða að „Framsóknarflokkurinn gæfi ekki eftir íslenska hagsmuni“ varð vandræðaleg þegar kom í ljós að hún var ekki niðurstaða í leyniskýrslu heldur endurtekning á fullyrðingu aðstoðarmanns Sigmundar í dreifibréfi.
2Óþol fyrir gagnrýni
Ekki var liðinn nema einn mánuður af valdatíma Sigmundar Davíðs þegar hann byrjaði að ásaka aðra um að gera „loftárásir“ á sig. Hluti af því var að RÚV skyldi fjalla um undirskriftasöfnun gegn lögum um veiðigjald. Síðan hefur Sigmundur nýtt mörg tækifæri á opinberum vettvangi til að gagnrýna þá sem eru gagnrýnir á hann. Meðal annars hefur hann uppnefnt þá „niðurrifsöfl“ og gefið til kynna að þeir vilji Íslandi illt, eða hafi „.. brenglaða sýn [sem] nær athyglinni og gefur tóninn fyrir umræðuna...“
„Þeir eru til sem hafa ekki trú á Íslandi, þeir sem ala á sundrung og þeir sem aðhyllast öfgakennda hugmyndafræði,“ sagði hann meðal annars hálfu ári eftir að hann komst til valda.
3Matarskatturinn
Þegar Sigmundur frétti af því að síðasta ríkisstjórn væri að íhuga að hækka matarskattinn þótti honum það kalla á að hann kæmist til valda. „Það er löngu sannað að skattahækkanir á matvæli koma verst við þá sem lægst hafa launin ... Að hækka virðisaukaskatt á matvæli í þeirri stöðu sem nú ríkir er hrein aðför að láglaunafólki. Þetta er rangt og þetta verður að stöðva … Ef af slíkum skattahækkunum verður er algerlega ljóst að fyrsta verk Framsóknar í ríkisstjórn verður að afnema þær,“ lýsti hann yfir.
Eftir að Sigmundur og Framsókn komust í ríkisstjórn gerðu þau eftirfarandi: Hækka matarskatt um 4 prósentustig, eða hátt í 60%.
4Norska lánið
Sigmundur Davíð stimplaði sig heldur betur inn í þjóðfélagsumræðuna haustið 2009 þegar hann fullyrti í fjölmiðlum að hann væri með lausn á kreppunni. Hann hefði farið til Noregs með Höskuldi Þór Þórhallssyni, félaga sínum, og fengið vilyrði fyrir yfir tvö þúsund milljarða lán frá Noregi. Jens Stoltenberg, forsætisráðherra Noregs, svaraði síðan umleitan um það skriflega með neitun. Sigmundur kenndi Jóhönnu Sigurðardóttur, þáverandi forsætisráðherra, um að hafa eyðilagt fyrir láninu.
5SMS-styrkir
Í mars í fyrra kom í ljós að Sigmundur hefði einhliða tekið ákvörðun um að senda 100 milljóna króna í styrki í kjördæminu sínu. Meðal annars sendi Sigmundur SMS-skilaboð á oddvita Framsóknarflokksins í Fljótsdalshéraði og tilkynnti um 5 milljón króna styrk, án þess að umsókn hefði borist um styrkinn. Þegar Ríkisendurskoðun gerði athugasemdir við að forsætisráðherra úthlutaði einhliða styrkjum hingað og þangað ófaglega, og án ferla eða auglýsinga, var svar Sigmundar að senda yfirlýsingu til fjölmiðla þar sem því var fagnað að hann hefði ekki gerst brotlegur við lög. „Úttektin staðfestir að forsætisráðuneytið fór að lögum,“ sagði í yfirlýsingunni, en jafnframt var allri gagnrýninni hafnað.
6Moskumálið
Eftir að frambjóðendur Framsóknarflokksins gerðu það að kosningamáli að leggjast gegn því að múslimar fengju að byggja mosku í Reykjavík þagði Sigmundur Davíð. Síðar, þegar hann tjáði sig, gagnrýndi hann þá sem gagnrýndu stefnu flokksins. „Þegar menn seilast svo langt að saka heilu hópana um kynþáttaníð að ósekju þá er það ekki bara alvarlegt mál fyrir þá sem fyrir því verða heldur fyrir samfélagið allt.“
Athugasemdir