Það býður upp á áhugaverða naflaskoðun að setja saman í hvelli dálitla grein um hamingjuna í lífinu. Ef hamingja er tilfinningin um að tíminn vinni með þér og tilveran sé ágætis málstaður, þá kemur auðvitað fyrst í hugann hversu gott er að eiga heillandi lífsförunaut og yndisleg börn, þar af tvö nýfædd, sem slá út alla mæla Hamingjustofu Íslands tvisvar á dag: Þegar þau vakna á morgnana og þegar þau sofna á kvöldin.
Greinin gæti auðveldlega endað hér en þetta er kannski ágætis tilefni til að halda til haga nokkrum einföldum, og um leið yfirborðslegum, punktum sem auka hamingjuna með því að mjaka tilverunni í rétta átt. Athugið, þetta er ekki tæmandi listi!
Gott kaffi
Þetta er mjög mikilvægt. Ég fór nýlega á espresso-námskeið og lærði loksins að nota 10 ára espresso-kaffivélina okkar almennilega – sem kemur sér líka vel þegar maður á nýfædda tvíbura sem sofa ekki endilega eftir pöntun.
Lykillinn að miklu betra kaffi fólst einfaldlega í nokkrum litlum atriðum: Betri kvörn, minni kaffinotkun í hvert skipti en kraftmeiri þjöppun og svo framvegis. Táknmynd fyrir lífið?
(Smá tips: Það er betra að spara í vali á kaffivél en á kaffikvörn.)
Sofðu betur
Ef þú getur, fáðu þér þá gott rúm því þegar svefninn er í lagi verður allt hitt aðeins auðveldara.
Sofðu lengur
Leyfðu morgundeginum að koma klukkutíma fyrr og hann verður miklu, miklu betri. Ég fór alltaf að sofa klukkan eitt – þangað til ég fattaði að ég var eiginlega bara vakandi eftir miðnætti því ég nennti ekki að fara að sofa. Ef börn halda fyrir þér vöku, fáðu svefnráðgjöf fyrir þau hjá Örnu Skúladóttur á Barnaspítalanum. Hún bjargaði okkur – til allrar hamingju!
Farðu hægar
Það er gott að hægja á hlutunum öðru hverju, ganga frekar en að keyra, sökkva sér í sjónvarpsþætti með hægri, en djúpri framvindu og elda ólseigan kjötbita í margar klukkustundir til að búa til safaríka bragðsprengju.
Þessu tengt: Leggðu meira upp úr því að hráefnið sé gott frekar en að gera eitthvað svakalega flókið við það. Leitaðu að ferskasta fiskinum, nýjustu eggjunum, fitusprengdasta nautakjötinu og svo framvegis.
Fækkaðu skuldunum
Það er sérstakur unaður sem fylgir því að borga á borðið. Það er vissulega leiðinlegt að safna, en það er enn leiðinlegra að skulda.
Semdu frið við IKEA
Eftir áraraðir þar sem ég hreinlega þoldi ekki að heimsækja þessa húsgagna-hel og ganga þar hring vítis eftir fyrirfram ákveðinni braut – og setja draslið saman sjálfur þegar heim er komið – samdi ég frið. IKEA-vörurnar hafa skánað mjög í útliti síðustu árin og eru eiginlega nauðsynlegar þegar maður er að skapa þægilega umgjörð fyrir fjölskylduna. Þetta er necessary evil, en lærðu endilega hvernig þú styttir þér leið gegnum búðina.
Notaðu verkfæri
Þessu tengt, þá mæli ég með því að eignast góð verkfæri og læra að nota þau. Þetta atriði er enn í vinnslu hjá mér enda er ég algjör handverksrati. Ódýra „há“þrýstidælan sem ég keypti í fyrra er dæmi um pirrandi hlut. Ég væri hamingjusamari ef ég ætti færri en betri verkfæri og það gildir svo sem um fleiri hluti.
Ekki láta Facebook svekkja þig
Það er freistandi að nota samfélagsmiðla til að monta sig af hinu og þessu en, kommon, það eru allir í einhverju streði. Það er meira að segja líklegt að þá sem eru flottastir á Facebook vanti einmitt eitthvað sem þér finnst sjálfsagt. Fyrir mína parta þá vex í réttu hlutfalli við að pósta sjaldnar og sjaldnar á Facebook og forðast öll rifrildi og pirring. Reynum alla vega að setja verðskuldaða reiði fram á skemmtilegan hátt og, fyrst ég er byrjaður, þá skulum við endilega birta færri svekkjandi skíðaferða- og sundlaugarmyndir frá útlöndum með textanum „Just another day at the office“.
Þessu tengt, þá er ágætt að vera bara sem mest sama um hvað einhverju fólki úti í bæ finnst um hitt og þetta sem maður gerir. Latir menn eins og ég ættu samt að fara varlega með þessa uppgötvun.
Hamingjan er ekki eitthvað eitt
Lífið verður aldrei fullkomið, það verður alltaf eitthvað ströggl, alls konar bakslög og óvænt verkefni – og það er hamingjuskref að sætta sig við það en hafa samt trú á málstaðnum og halda ótrauður áfram.
Að lokum: Það kom mér á óvart hversu gott er að enda daginn á því að rifja upp það helsta sem maður getur þakkað fyrir, hvort sem þú kallar það bæn, hugleiðslu eða bara aðferð til að enda daginn á brosi. Það er til dæmis ekkert sjálfsagt að hafa þak yfir höfuðið, eiga hraust börn og maður sé sjálfur í þokkalegu standi. Takk fyrir okkur.
Athugasemdir