Árið 1682 birtist óvenjulegur bátur undan strönd Eiðeyjar, sem er ein Orkneyja, rétt norðan við meginland Skotlands. Þetta var lítill bátur, ekki nema einn maður um borð og hann virðist hafa haft einhvern seglabúnað uppi en þó fyrst og fremst róið.
Séra James Wallace var prestur í Kirkwall á Orkneyjum og hann sagði svo frá að allir íbúar á Eiðey hefðu flykkst niður í fjöru til að fylgjast með manninum á bátnum, sem sýnir að hann var mjög framandlegur.
En þegar Orkneyingar skutu út báti til að reyna að góma aðkomumanninn, þá reri hann burt á miklum hraða og hvarf sjónum.
Séra Wallace segir að maður þessi hafi verið af þjóð Finna, og hann bætir við að annar finnskur bátur hafi birst tveimur árum seinna við Vesturey, sem er skammt frá Eiðey. Allur fiskur hafi þá horfið af miðunum, enda telji Orkneyingar að Finnar veiði annaðhvort allan fisk þar sem til báta þeirra sést, eða þá að þeir hreki fiskinn á sínar heimaslóðir.
Í skrifum séra Wallace kemur einnig fram að sumir telji að Finnar þessir komi úr Davis-sundi, en það er milli Grænlands og Baffinlands í Norður-Ameríku, það er að segja víðsfjarri Finnlandi. Og greinilega hefur að minnsta kosti einu sinni náðst „finnskur“ bátur, því hann segir að einn slíkur hafi verið sendur frá Orkneyjum til Edinborgar, þar sem hann sé til sýnis ásamt ár bátsverjans og spjóti sem hann hafi notað til að veiða fisk.
Einnig eru til frásagnir um að „Finnar“ þessir hafi sést við Orkneyjar árið 1701 og svo að lokum árið 1728.
Hér var að sjálfsögðu ekki um neina Finna að ræða, en séu þessar lítt þekktu frásagnir séra Wallace á rökum reistar - sem út af fyrir sig er engin ástæða til að efast um - þá virðast hér hafa komnir Inúítar frá Grænlandi. En þeir lifðu þá - eftir því sem best er vitað - í algjörri einangrun á Grænlandi.
Frá Inútíabyggðum við Davis-sund eða hina gömlu Eystribyggð norrænna manna á Grænlandi og til Orkneyja eru 2.500-3.000 kílómetrar.
Það var fyrst árið 1721 sem norski trúboðinn og presturinn séra Hans Egede stýrði fyrsta leiðangri Evrópumanna í margar aldir til að skoða Grænland. Egede ætlaði sér að finna þá norrænu menn sem á Grænlandi byggju en fann bara Inútía.
En Inúítar hafa greinilega getað unnið meiri siglingaafrek en nokkurn hefði órað fyrir.
Athugasemdir