„Að rík­is­stjórn­ar­flokk­arnir beri ein­hverja ábyrgð á þessu eða að þetta sé eitt­hvað stór­kost­legt mál að þessu leyti, ég er ekki að kaupa það.“ 

Þannig komst Brynjar Níelsson, þing­maður Sjálf­stæð­is­flokks­ins, að orði í Morg­un­út­varpi Rásar 2 í morgun þegar rætt var um brott­flutn­ing kasól­éttrar konu til Albaníu. Konan, sem er gengin 36 vikur á leið, var send í 19 klukku­stunda ferða­lag þótt læknir hefði mælt gegn því að hún færi í langt flug. Konan er nú með verki og hefur þurft að leita sér lækn­is­að­stoðar í Albaníu.  

„Það bara gilda ákveðnar reglur og stofn­unin fer eftir þeim,“ sagði Brynjar í Morg­un­út­varp­inu. „Það var í þessu máli þannig að göngu­deild sótt­varna eða eitt­hvað, sem er með samn­ing við Útlend­inga­stofun um að sinna lækn­is­þjón­ustu, þeir segja að við­kom­andi sé það sem kallað er á ensku “fit to fly”, hæf til að fljúga þessa vega­lengd og aðal­at­riðið er að þessi mál séu leyst mjög fljótt.“

„Þeir segja að við­kom­andi sé það sem kallað er á ensku “fit to fly” og aðal­at­riðið er að þessi mál séu leyst mjög fljótt“

Brynjar er ekki eini áhrifa­mað­ur­inn í Sjálf­stæð­is­flokknum sem rétt­lætt hefur brott­flutn­ing­inn. Björn Bjarna­son, fyrr­ver­andi dóms­mála­ráð­herra, bloggar um málið í dag undir yfir­skrift­inni „Lögmæt brott­vísun sætir gagn­rýni“ þar sem hann kemur útlend­inga­yf­ir­völdum til varnar. 

„Þor­steinn Gunn­ars­son, settur for­stjóri Útlend­inga­stofn­unar, sat fyrir svörum í Kast­ljósi að kvöldi 5. nóv­em­ber. Hann gerði skil­merki­lega grein fyrir því að engar reglur hefðu verið brotnar af hálfu opin­berra aðila,“ skrifar Björn. „Upphaf máls­ins er að sjálf­sögðu að konan kom hingað með fjöl­skyldu sinni á ólög­mætum for­sendum. Þetta er ekki fyrsta dæmið um að leit­ast sé við að kom­ast undan lög­mætri afgreiðslu yfir­valda með því að höfða til mann­úðar á almennum vett­vangi. Þar er sagan öll yfir­leitt ekki sögð.“

„Konan kom hingað með fjöl­skyldu
sinni á ólög­mætum for­sendum“

Þá er fjallað um málið í leið­ara Morg­un­blaðs­ins sem rit­stýrt er af Haraldi Johann­es­sen og Davíð Oddssyni fyrr­ver­andi for­sæt­is­ráð­herra og for­manni Sjálf­stæð­is­flokks­ins. Þar eru þing­menn sem gagn­rýnt hafa brott­vís­un­ina sak­aðir um hræsni, enda hafi þeir hinir sömu stutt frum­varp heil­brigð­is­ráð­herra um þung­un­ar­rof. Rit­stjór­inn segir Loga Ein­ars­son, for­mann Sam­fylk­ing­ar­innar, „glenna sig opin­ber­lega í hlut­verki góð­mennis vegna brott­vís­unar fólks frá Albaníu“. „Þá gengur konan sem á í hlut ekki með frumuklasa eins og Sam­fylk­ing kallar barn í móð­ur­kviði, þegar rætt er um víð­tæk­ari heim­ildir til að eyða því. Þá er það hagur barns sem er í hættu.“

„Albanía er ekki eitt af þeim löndum, þar sem stjórn­ar­far er svo slæmt, að taka þurfi við póli­tískum flótta­mönnum þaðan“

Hannes Hólm­steinn Giss­ur­ar­son, stjórn­mála­fræði­pró­fessor og einn helsti hug­mynda­fræð­ingur Sjálf­stæð­is­flokks­ins und­an­farna ára­tugi, leggur einnig orð í belg. „Auðvitað sækir fólk frá Albaníu til Íslands eins og ann­arra ríkra landa. En ef það seg­ist vera póli­tískir flótta­menn, þá stenst það alls ekki, því að Albanía er ekki eitt af þeim löndum, þar sem stjórn­ar­far er svo slæmt, að taka þurfi við póli­tískum flótta­mönnum þaðan,“ skrifar hann á Facebook. „Alþjóð­legir glæpa­hringir fást við að smygla fólki yfir landa­mæri til ríkra landa og fylgj­ast með því, hvar fyr­ir­staðan er minnst.“ Þá deilir hann grein Björns Bjarna­sonar um málið.

Fram kom í frétt RÚV í gær­kvöldi að Áslaug Arna Sig­ur­björns­dóttir dóms­mála­ráð­herra hefði fall­ist á skýr­ingar Útlend­inga­stofn­unar um að settum reglum hefði verið fylgt í mál­inu. „Það virð­ist vera að þarna var fylgt þeim almennu reglum sem þau hafa,“ sagði hún. Þá fagn­aði hún því á Twitter að Útlend­inga­stofnun ætli að „fara yfir gild­andi reglur“ með land­lækni.