Björn Ingi Hrafns­son, rit­stjóri Viljans, var með tæpar 2,9 millj­ónir króna á mán­uði í laun sam­kvæmt álagn­ing­ar­skrá rík­is­skatt­stjóra. Hafa mán­að­ar­laun hans hækkað frá 2017 þegar þau voru 2,5 millj­ónir króna, en þá rak Björn Ingi fjöl­miðla Vef­pressunnar.

Björn Ingi stofn­aði Viljann í nóv­em­ber á síð­asta ári og því ólík­legt að tekjur hans hafi að mestu komið frá því starfi. Var hann alls með 34,3 millj­ónir króna í árs­laun í fyrra. Á tíma­bili átti hann félagið BOS ehf. sem rak Argent­ínu steik­hús. Hefur það síðan verið tekið til gjald­þrota­skipta.

Síðasta ár var storma­samt hjá Birni Inga. Hann var grun­aður um brot vegna bók­halds og skatt­skila á árunum 2014 til 2017 og kyrr­setti toll­stjóri nær 115 millj­ónir króna af eignum hans vegna máls­ins. Skatt­rann­sókn­ar­stjóri lauk rann­sókn­inni í byrjun árs 2019 og taldi ekki til­efni til að aðhaf­ast frekar í mál­inu. „En allt er gott sem endar vel,“ skrif­aði Björn Ingi á Facebook þegar mál­inu var lokið. „Dag er farið að lengja og landið er að rísa.“

Þá greindi eig­in­kona Björns Inga, Kolfinna Von Arn­ar­dóttir, frá því í byrjun árs í færslu á Facebook að Aron Einar Gunn­ars­son knatt­spyrnu­maður hafi farið fram á per­sónu­legt gjald­þrot hennar. Deilur hafa staðið á milli þeirra vegna fjár­fest­ingar í fata­merk­inu JÖR.

Nú síð­ast krafði Rík­is­skatt­stjóri Björn Inga um tæpar 8 millj­ónir króna sam­kvæmt gerð­ar­bók fjár­náms hjá sýslu­mann­inum á höf­uð­borg­ar­svæð­inu þann 12. júní. Gert var fjár­nám í fjórum eignum Björns Inga að Más­stöðum í Hval­firði.