Guðlaugur Þór Þórðarson utanríkisráðherra ræddi við Mevlüt Çavuşoğlu, utanríkisráðherra Tyrklands, innan við tveimur sólarhringjum eftir að deila kom upp vegna meintrar móðgunar við tyrkneska karlalandsliðið í knattspyrnu við komu þess til landsins. Eva Hauksdóttir segir þetta sýna að ráðuneytið telji málið mikilvægara en mál sonar síns, Hauks Hilmarssonar, sem talinn er hafa látist í loftárásum Tyrkja í Afrin í norðurhluta Sýrlands.

„Þegar fréttist að Haukur hefði farist í loftárás Tyrkja fór ég fram á að utanríkisráðuneytið hefði samband við ráðamenn í Tyrklandi til að fá það staðfest eða hrakið,“ skrifar Eva á Facebook. „Ég fékk þau svör að það væri „ekki hægt“, „þannig væru slík mál ekki unnin“, að allt yrði að fara „eftir diplómatískum kanölum“. Þegar bróðir Hauks, pabbi hans, systkini mín og fleiri úr hópi ættingja og vina sættu sig ekki við þau svör og neituðu að yfirgefa ráðuneytið fyrr en utanríkisráðherra fengist til að funda með fjölskyldunni var það svo skyndilega hægt.“

Eva segir að seinna hafi komið í ljós að samtal Guðlaugs Þórs Þórðarsonar utanríkisráðherra við varnarmálaráðherra Tyrklands hafi ekki verið að hans undirlagi, heldur hafi Rósa Björk Brynjólfsdóttir, þingmaður Vinstri grænna, séð til þess að varnarmálaráðherrann hefði samband.

„En við skulum athuga að í því tilviki var líka bara um að ræða mannslíf,“ skrifar Eva. „Ekki eitthvað mikilvægt eins og það að láta tyrknesk stjórnvöld vita að ráðherra vildi alls ekki að menn væru að móðga landsliðið.“