Tveir af fjórmenningunum sem skipaðir voru landsréttardómarar í trássi við mat hæfnisnefndar árið 2017 hafa nú sótt um dómarastöðu sem nýlega losnaði við Landsrétt vegna starfsloka Vilhjálms H. Vilhjálmssonar eldri.

Þetta eru þau Ásmundur Helga­son og Ragn­heiður Braga­dótt­ir. Dómararnir, auk Arnfríðar Einarsdóttur og Jóns Finnbjörnssonar, hafa ekki dæmt í málum síðan Mannréttindadómstóll Evrópu dæmdi íslenska ríkið brotlegt í Landsréttarmálinu þann 12. mars síðastliðinn. 

Á meðal umsækj­enda um lausu dómarastöðuna eru einnig Ást­ráður Har­alds­son, Eiríkur Jóns­son og Jón Hösk­ulds­son, þrír þeirra fjög­urra sem metnir voru á meðal 15 hæfustu umsækjenda en gengið var fram hjá við skipun landsréttardómara á sínum tíma.

Enn ríkir óvissa um afleiðingar dóms MDE. Í ljósi þess að ríkisstjórn Íslands hefur freistað þess að skjóta Landsréttarmálinu til yfirdeildar Mannréttindadómstóls Evrópu mun Hæstiréttur ekki taka afstöðu til afleiðinga dóms MDE  að landsrétti næstu mánuði eða ár.