Þjóðernissinnar sem beita sér gegn komu múslima til Íslands standa að fyrirlestri rithöfundarins Douglas Murray í Kaldalóni í Hörpu á fimmtudag. Murray mun kynna bók sína „Dauði Evrópu: Innflytjendur, sjálfsmynd, íslam“ en Jón Magnússon, lögmaður og fyrrverandi þingmaður Sjálfstæðisflokksins, þýddi á íslensku. Félagið Tjáningarfrelsið gefur út bókina og heldur viðburðinn, en félagið er nátengt þjóðernissinnasamtökunum Vakur.
Murray er breskur rithöfundur og ný-íhaldsmaður (e. neoconservative), sem skrifar um innflytjendamál, trúarbrögð og „misheppnaða fjölmenningarstefnu“. Í nýju bókinni fjallar hann um að Evrópa sé við það að „fremja sjálfsmorð“ vegna aðgerðaleysis gagnvart straumi innflytjenda. Verið sé að skipta út „evrópskum mannfjölda“ fyrir aðra í slíku magni að hlutar borga líti meira út eins og Pakistan en Evrópa. Leggur hann mikla áherslu á húðlit og kristin trúarbrögð í lýsingum sínum á Evrópubúum.
Einn af aðdáendum Murray er Viktor Orbán, forsætisráðherra Ungverjalands, sem rekið hefur harða innflytjendastefnu síðan hann tók við völdum árið 2010. Birti hann mynd af sér á Facebook við lestur bókarinnar.
Sögðu íslam „mesta vandamál“ sem steðjar að heiminum
Félag sem kallar sig Tjáningarfrelsið stendur að viðburðinum í Hörpu og útgáfu bókarinnar. Formaður þess er Valdimar H. Jóhannesson, en aðrir stofnaðilar Arndís Hauksdóttir og Edith Alvarsdóttir. Í stjórn félagsins hafa einnig verið Magnús Þór Hafsteinsson, fyrrverandi þingmaður Frjálslynda flokksins, og Margrét Friðriksdóttir, sem hefur látið mikið til sín taka í umræðum um innflytjendur.
Árið 2016 sendi félagið þúsund útskriftarnemum úr háskólum landsins bókina „Þjóðarplágan íslam“ eftir norsku blaðakonuna Hege Storhaug að gjöf. Í bréfi sem fylgdi bókinni sagði að ósk félagsins væri að þeir sem fengju bókina að gjöf gæfu hana áfram eftir að hafa lesið hana „svo að sem flestum gefist kostur á því að kynna sér efni hennar“. Bókin ætti erindi til allra sem vildu ástunda upplýsta umræðu um „eitt helsta vandamál, sem steðjar að heiminum nú um stundir“. Um ástæður þess að bókin væri gefin í stóru upplagi, sagðist Valdimar hafa fengið styrk frá nafnlausum hópi.
Samtökin Vakur, sem á vef sínum og samfélagsmiðlum ganga hart fram gegn múslimum og fjölmenningarsamfélagi, hafa kynnt viðburðinn að undanförnu. Á sérstakri vefsíðu sem samtökin hafa sett upp vegna fyrirlestursins er Murray sagður meðal eftirsóttustu fyrirlesara heims um íslam, fjölmenningu og innflytjendamál. „Íslendingum er sérstaklega hollt að hlusta á hann á þeim tímamótum þegar við getum enn komist hjá því að fara þá óheillabraut sem margar nágrannaþjóðir okkar hafa gengið.“
Samtökin fluttu áður inn umdeildan fræðimann, Robert Spencer, sem gagnrýndur hefur verið fyrir hatursáróður gegn múslimum. „Vakur vill upplýsta umræðu um hvort við viljum breytast úr evrópsku og lýðræðislegu þjóðríki í eitthvað óskilgreint fjölmenningarríki?“ segir á vefsíðu samtakanna.
5000 krónur kostar inn á viðburðinn og með miðanum fylgir réttur til að kaupa bók Murray á 50 prósent afslætti.
Ritskoða ekki nema sérstakt tilefni sé til
„Almennt má segja að Harpa er opinn vettvangur fyrir lýðræðislega umræðu og tjáningarfrelsi,“ segir Svanhildur Konráðsdóttir, forstjóri Hörpu. „Það er gríðarlegur fjöldi viðburða í húsinu og við erum ekki að mynda okkur skoðun á innihaldinu nema eitthvað sérstakt tilefni sé til.“
Svanhildur segir stefnumótun fara fram í Hörpu um þessar mundir hvað þetta varðar. „Þetta er eitt af því sem við viljum draga skýrari línur um,“ segir hún. „Það er að segja hvers konar viðburðir eru einhverra hluta vegna þess lags að við viljum ekki setja þá upp hér í húsi. En það er ekki alveg búið að fullmóta það og eins og þú getur ímyndað þér er það viðkvæmt og umdeilanlegt mál. Við ætlum ekki að taka okkur dagskrárgerðar- eða ritskoðunarvald þegar kemur að viðburðum þriðja aðila. Nema eitthvað sérstakt tilefni sé til.“
Athugasemdir