Þingflokkur Pírata gerir kröfu um tafarlausa afsögn Sigríðar Andersen dómsmálaráðherra í ljósi niðurstöðu Mannréttindadómstóls Evrópu. Í dómi sem kveðinn var upp í morgun var íslenska ríkið dæmt brotlegt vegna vinnubragða dómsmálaráðherra þegar hún skipaði fjóra dómara við Landsrétt í trássi við mat hæfnisnefndar sumarið 2017.

Þá krefst þingflokkur Pírata þess að Sigríður komi á opinn fund allsherjar- og menntamálanefndar vegna dómsins og að það fari fram sérstakar umræður við forsætisráðherra á Alþingi um áhrif dómsins á réttarríkið á Íslandi.

„Niðurstaða Mannréttindadómstóls Evrópu um málsmeðferð dómsmálaráðherra við skipan dómara í Landsrétt er áfellisdómur yfir athöfnum ráðherrans,“ segir í yfirlýsingu þingflokksins. „Með þessu eru staðfestar ítrekaðar viðvaranir þingflokks Pírata, fyrst við skipan dómara í Landsrétt árið 2017 og svo í umræðu um vantrauststillögu á dómsmálaráðherra ári síðar.“

Þá segir að Landsréttarmálið sé skýrt dæmi um pólitíska spillingu. Viðbrögð ríkisstjórnarinnar muni koma til með að skera úr um traust almennings til Alþingis, dómstóla og framkvæmdavaldsins til framtíðar.

Yfirlýsingin í heild sinni

Niðurstaða Mannréttindadómstóls Evrópu um málsmeðferð dómsmálaráðherra við skipan dómara í Landsrétt er áfellisdómur yfir athöfnum ráðherrans. Með þessu eru staðfestar ítrekaðar viðvaranir þingflokks Pírata, fyrst við skipan dómara í Landsrétt árið 2017 og svo í umræðu um vantrauststillögu á dómsmálaráðherra ári síðar.

Dómurinn sýnir svo ekki verður um villst að með ólögmætri skipan sinni hafi dómsmálaráðherra stuðlað að mannréttindabrotum í garð allra þeirra sem hafa þurft að sæta málsmeðferð af hálfu ólöglega og pólitískt skipaðra dómara. Píratar hafa ítrekað bent á að skipanin væri ólögmæt og athafnir Sigríðar Á. Andersen óforsvaranlegar og brot á 1. mgr. 6. gr. mannréttindasáttmála Evrópu um réttláta málsmeðferð. Það hefur nú verið staðfest bæði af Hæstarétti og af Mannréttindadómstól Evrópu.

Landsréttarmálið er skýrt dæmi um óeðlileg afskipti framkvæmdavaldsins af dómsvaldinu og pólitíska spillingu. Viðbrögð ríkisstjórnarinnar í dag munu koma til með að skera úr um traust almennings til Alþingis, dómstóla og framkvæmdavaldsins til framtíðar.

Þingflokkur Pírata gerir kröfu um tafarlausa afsögn dómsmálaráðherra. Þá hefur Þórhildur Sunna Ævarsdóttir kallað eftir því að dómsmálaráðherra komi á opinn fund í allsherjar- og menntamálanefnd vegna dómsins og að fram fari sérstakar umræður við forsætisráðherra á Alþingi um áhrif dómsins á réttarríkið á Íslandi.