Vit­neskja um klúr bréf Jóns Baldvins Hanni­bals­sonar til Guðrúnar Harð­ar­dóttur, fjöl­skyldu­með­lims hans á tán­ings­aldri, var til staðar innan Sam­fylk­ing­ar­innar í fimm ár áður en bréfin voru gerð opin­ber í Nýju lífi árið 2012. Formaður Sam­fylk­ing­ar­fé­lags­ins í Reykja­vík fékk að skoða bréfin á meðan Jón Baldvin kenndi nám­skeið á vegum félags­ins, en Jóni var haldið sem kenn­ara.

Í Stund­inni lýsa fjórar konur kyn­ferð­is­legri áreitni af hendi Jóns Baldvins. Guðrún lýsir sjálf því að Jón Baldvin hafi „fengið sig á heil­ann“ þegar hún var 13 til 14 ára og reynt að kyssa sig á Ítalíu. Umfjöll­un­ina í heild má lesa í tölu­blaði Stund­ar­innar sem kom út í gær.

Í des­em­ber 2011, skömmu áður en Guðrún steig fram í Nýju lífi, var til­kynnt að Jón Baldvin yrði leið­bein­andi á nám­skeiði Sam­fylk­ing­ar­fé­lags­ins í Reykja­vík, sem fram færi í jan­úar og febr­úar 2012. Nám­skeiðið fjall­aði um skýrslu Rann­sókn­ar­nefndar Alþingis um banka­hrunið og var ein­ungis opið flokks­mönnum.

Samkvæmt heim­ildum Stund­ar­innar reyndi Ingi­björg Sólrún Gísla­dóttir, fyrr­ver­andi for­maður flokks­ins, að sann­færa for­ystu Sam­fylk­ing­ar­fé­lags­ins í Reykja­vík um að Jón Baldvin yrði ekki leið­bein­andi á nám­skeið­inu.

Kjartan Val­garðs­son, þáver­andi for­maður Sam­fylk­ing­ar­fé­lags­ins í Reykja­vík, stað­festir í sam­tali við Stundina að Ingi­björg Sólrún hafi lýst óánægju sinni með þetta. „Þetta kom upp þegar nám­skeiðið var byrjað,“ segir Kjartan. „Þessum upp­lýs­ingum var komið til mín og ég fór og las þessi bréf og var nátt­úr­lega brugðið. Í sam­ráði við félaga mína ákvað ég samt að klára nám­skeiðið, þar sem það var held ég aðeins eitt kvöld eftir.“

Kjartan seg­ist hafa rætt málið við Jón Baldvin. „Hann var ekki ánægður, eins og þú getur ímyndað þér. Ég vildi bara láta hann vita að ég vissi af þessu og „confrontera“ hann með þetta. Auðvitað var það álita­mál hvort það ætti að láta hann halda áfram eða ekki. Þetta varð hins vegar til þess að Ingi­björg Sólrún Gísla­dóttir sagði sig úr Sam­fylk­ing­ar­fé­lag­inu í Reykja­vík. Mér fannst vont að missa þessa miklu for­ystu­konu úr félag­inu.“

„Ég er ekki í nokkrum vafa um að fólki var mis­boðið að við skyldum halda þetta nám­skeið með honum.“

Bréfin voru gerð opin­ber 23. febr­úar 2012, skömmu eftir að nám­skeið­inu lauk. „Okkur var kunn­ugt um að þetta hefði legið inni á rit­stjórnum blaða árum saman en það þorði eng­inn að taka á þessu,“ segir Kjartan. „Ég er ekki í nokkrum vafa um að fólki var mis­boðið að við skyldum halda þetta nám­skeið með honum. Ég hafði heyrt þessar sögur en taldi ekki að þær væru nægar til að hafa hann ekki. Ég get full­yrt að þessi ákvörðun okkar hafi ýtt á það að bréfin voru gerð opin­ber.“

Var tekinn úr heiðurssæti Samfylkingarinnar

Í byrjun árs 2007 hafði Jón Baldvin verið skip­aður í heið­urs­sæti á fram­boðs­lista Sam­fylk­ing­ar­innar fyrir kom­andi alþing­is­kosn­ingar, eins og alvana­legt er með fyrrum ráð­herra og framá­menn í stjórn­mála­hreyf­ingum. Í mars sama ár var Guðrúnu til­kynnt um að Rík­is­sak­sókn­ari hefði ákveðið að fella mál hennar gegn Jóni Baldvini niður.

Ingi­björg Sólrún var for­maður Sam­fylk­ing­ar­innar á þessum tíma. Hún og Magda­lena Schram, móðir Guðrúnar, höfðu verið miklar vin­konur áður en Magda­lena lést árið 1993. Ingi­björgu varð kunn­ugt um til­vist bréf­anna og fékk aðgang að þeim. Í kjöl­farið boð­aði hún Jón Baldvin til fundar ásamt Degi B. Egg­erts­syni borg­ar­full­trúa, þar sem Jóni Baldvini var tjáð að hann yrði fjar­lægður af fram­boðs­lista flokks­ins. Jón Baldvin var oft til umfjöll­unar í fjöl­miðlum eftir það og var vöngum velt yfir því hvort hann tæki sæti á lista nýstofn­aðrar Íslands­hreyf­ingar Ómars Ragn­ars­sonar.

Ekkert varð þó úr fram­boði Jóns Baldvins það árið. Tveimur árum síðar, að loknu banka­hruni og bús­á­halda­bylt­ingu, bauð Jón Baldvin sig fram í próf­kjöri Sam­fylk­ing­ar­innar fyrir þing­kosn­ingar sem boðað hafði verið til vorið 2009. Hlaut hann ekki braut­ar­gengi.