Björn Bragi Arnarsson, sjónvarpsmaður og grínisti, játar að hafa snert 17 ára stúlku „á ósæmilegan hátt“ og biðst afsökunar í tilkynningu á Facebook í nótt. Myndband sem sýnir atvikið fór á dreifingu á samfélagsmiðlum í gærkvöldi.

Samkvæmt 199. gr. almennra hegningarlaga skal hver sá sem gerist sekur um kynferðislega áreitni sæta fangelsi allt að 2 árum. „Kynferðisleg áreitni felst m.a. í því að strjúka, þukla eða káfa á kynfærum eða brjóstum annars manns innan klæða sem utan, enn fremur í táknrænni hegðun eða orðbragði sem er mjög meiðandi, ítrekað eða til þess fallið að valda ótta,“ segir í greininni. Þá segir í 99. gr. barnaverndarlaga að vanvirðandi háttsemi gagnvart barni skuli sæta sektum eða fangelsi allt að þremur árum.

Atvikið átti sér stað aðfararnótt sunnudags. Myndbandið sýnir Björn Braga káfa á klofi 17 ára stúlku utan klæða. Samkvæmt tilkynningu hans í nótt þekktust þau ekki fyrir.

„Við áttum stutt samskipti og ég snerti hana á ósæmilegan hátt,“ skrifar hann. „Þessi hegðun mín var algjörlega óásættanleg og ég er miður mín yfir því að hafa hagað mér með þessum hætti. Það að ég hafi verið undir áhrifum áfengis er engin afsökun.“

Í tilkynningunni segist Björn Bragi hafa sett sig í samband við stúlkuna og fjölskyldu hennar á mánudagskvöld. „Ég bað hana einlægrar afsökunar á framkomu minni. Ég gekk of langt og tek fulla ábyrgð á þessu atviki. Ég átti gott samtal við móður stúlkunnar. Hún sagði mér að fjölmiðlar hefðu reynt að ná sambandi við bæði sig og stúlkuna. Hún vildi koma á framfæri ósk um að þau yrðu látin í friði. Það vil ég líka gera. Ég ber alla ábyrgð hér.“