Skopmyndateiknari Morgunblaðsins gerir tilraunir til björgunar á tveimur andarnefjum sem strönduðu í Engey í síðustu viku að viðfangsefni sínu í skopmynd dagsins. Á myndinni má sjá andarnefjuhval strandaðan á skeri með merkingunni Engey og í baksýn er bátur þar sem sjá má fólk um borð. Í talblöðru sem teiknuð er upp af fólkinu segir: „Þessir Engeyingar svífast einskis“ og titill myndarinnar er „Góða fólkið bjargar andarnefju út Engey.“ Virðist ætlun teiknarans þar með að hæðast að og setja samasem merki milli þeirra sem stóðu að björgun hvalanna og þeirra sem gagnrýnt hafa Engeyjarættina.

Fólk af Engeyjarætt hefur verið áberandi í íslensku þjóðlífi síðustu áratugi, einkum í viðskiptum og stjórnmálum. Þannig höfðu helstu athafnamenn Engeyjarættarinnar 920 milljónir aðeins í fjármagnstekjur á síðasta ári, samkvæmt nýlegri úttekt Stundarinnar. Af Engeyjarætt eru meðal annars Bjarni Benediktsson, formaður Sjálfstæðisflokksins og fjármálaráðherra, Benedikt Sveinsson faðir hans og Einar Sveinsson föðurbróðir Bjarna.

Fyrr í sumar tók Einar, sem er umfangsmikill fjárfestir, við stjórnarformennsku í Hval hf. Þá á hann 2,24 prósent hlut í fyrirtækinu í gegnum félag sitt P 126. Ingimundur Sveinsson, bróðir Einars, er einnig hluthafi í fyrirtækinu en félag hans Eldhrímnir ehf. á 1,53 í Hval hf. Hvalur er eina fyrirtækið á Íslandi sem stundar veiðar á stórhvelum og hefur setið undir mikilli gagnrýni undanfarið, ekki síst eftir að eftir að hvalveiðiskip fyrirtækisins skaut í júlí síðastliðnum sjaldgæfan blending steypireyðar og langreyðar. Dýra- og náttúruverndarsamtökin Jarðarvinir hafa kært Hval hf. fyrir drápið og byggja kæruna á því að fyrirtækið hafi einungis heimild til að veiða langreyðar.

Þá lagði Þorgerður Katrín Gunnarsdóttir, formaður Viðreisnar, fram fyrirspurnir til þriggja ráðherra á síðasta þingi varðandi hvalveiðar og hugsanleg áhrif þeirra á hagsmuni Íslands á alþjóðavettvangi, meðal annars á ferðaþjónustuna. Fyrirspurnum sem hún beindi til sjávarútvegs- og landbúnaðarráðherra og til ferðamála, iðnaðar- og nýsköpunarráðherra hefur þegar verið svarað. Hins vegar hefur utanríkisráðuneytið í þrígang óskað eftir fresti til að svara fyrirspurn þeirri sem beint var til utanríkisráðherra. Þorgerður segist telja að ekki sé samstaða innan ríkisstjórnarinnar um hvalveiðarnar. Ráðherrarnir þrír sem um ræðir eru allir úr Sjálfstæðisflokknum, flokki Bjarna Benediktssonar.