Eðlisfræðingurinn Stephen Hawking er látinn. Ég tók saman og þýddi lauslega nokkur af fleygustu ummælum hans.

„Gáfur eru hæfileikinn til að laga sig að breytingum.“

 „Mesti óvinur þekkingarinnar er ekki vanþekking, heldur ímynduð þekking.“

 „Ég lít á heilann sem tölvu sem mun hætta að starfa þegar hlutirnir í henni fara að bila. Það er ekki til neitt himnaríki eða framhaldslíf fyrir bilaðar tölvur; það eru ævintýri fyrir myrkfælna.“

 „Fortíðin, eins og framtíðin, er óendanleg og ekki til nema sem litróf allra möguleika.“

 „Við þurfum ekki annað en líta á okkur sjálf til að átta okkur á að vitsmunalíf getur þróast yfir í eitthvað sem okkur langar ekkert að hitta.“

 „Kannski eru til skuggastjörnuþokur, skuggasólir og jafnvel skuggafólk.“

 „Án ófullkomleikans væru hvorki þú né ég til.“

 „Ef geimverur kæmu í heimsókn, þá yrði það eins og þegar Kólumbus lenti í Ameríku. Það fór nú ekki vel fyrir Indíánana.“

 „Ég trúi því að líf sé algengt í alheiminum, þótt vitsmunalíf sé sjaldgæft. Sumir segja að það eigi enn eftir að þróast á plánetunni Jörð.“

 „Það var rangt hjá Einstein þegar hann sagði að Guð spilaði ekki teningaspil. Svartholin sýna okkur fram á annað. Það er ekki nóg með að Guð spili víst teningaspil … hann fleygir stundum teningunum þangað sem við sjáum þá ekki.“

 „Ráðlegging mín til annars fatlaðs fólks væri sú að einbeita sér að því að fötlunin kemur ekki í veg fyrir að þú gerir vel, og ekki syrgja það sem fötlunin kemur í veg fyrir. Ekki vera fatlaður í anda um leið og líkama.“

 „Ég hef tekið eftir því að jafnvel fólk sem er forlagatrúar og álítur að allt sé fyrirfram ákveðið, lítur í kringum sig áður en það fer yfir götu.“

 „Ég tel að tölvuvírusa beri að flokka sem lifandi verur. Það segir sína sögu um mannkynið að eina tilbúna lífið sem það hefur skapað er eingöngu niðurrifsafl. Við höfum skapað líf í okkar mynd.“

 „Í milljónir ára lifði mannkynið rétt eins og dýrin. Þá gerðist eitthvað sem leysti ímyndunarafl okkar úr læðingi. Við lærðum að tala og við lærðum að hlusta. Talið gerði okkur kleift að skiptast á hugmyndum og þannig gat mannkynið unnið saman við að byggja hið ómögulega. Mestu afrek mannsins hafa verið unnin með tali og mestu mistökin verða þegar við tölum ekki saman. Það þarf ekki að vera svoleiðis. Mestu vonir okkar gætu ræst í náinni framtíð. Með þá tækni sem við ráðum yfir eru möguleikarnir ótæmandi. Það eina sem við þurfum að passa upp á er að halda áfram að tala saman.“

 „Markmið mitt er einfalt. Það er að skilja alheiminn til hlítar, af hverju hann er eins og hann er og af hverju hann er yfirleitt til.“

 „Ég tel að einfaldasta skýringin [á tilvist Guðs] sé sú að það sé ekki til neinn Guð. Enginn skapaði heiminn og enginn stýrir örlögum okkar … Við höfum þetta eina líf til að skynja mikilleik alheimsins og fyrir það er ég einkar þakklátur.“

 „Munið að horfa upp til stjarnanna en ekki niður á tærnar á ykkur. Reynið að skilja það sem þið sjáið og furðið ykkur á hvers vegna heimurinn er til. Verið forvitin. Og hversu erfitt sem það virðist, þá er alltaf eitthvað sem þið getið og ráðið vel við. Það eina sem skiptir máli er að gefast ekki upp.“

 „Lífið væri hörmulegt ef það væri ekki fyndið.“

 „Vonir mínar urðu að engu þegar ég var 21s árs. Síðan hefur allt verið bónus.“

 „Fólk sem montar sig af greindarvísitölu sinni eru aumingjar.“

 „Við erum bara þróuð tegund af apaköttum á lítilli plánetu umhverfis nauðavenjulega stjörnu. En við skiljum alheiminn. Það gerir okkur afar sérstök.“