Eva Hauksdóttir, móðir Hauks Hilmarssonar sem er saknað í Sýrlandi, biður almenning um að senda sér upplýsingar um ferðir hans og lífsreynslu síðastliðið ár.
Tilkynnt var af tyrkneskum fréttamönnum og Facebook-síðu alþjóðlega, andfasíska uppreisnarhersins International Freedom Battalion að Haukur hefði látist í árás tyrkneska hersins í Afrin, í Norður-Sýrlandi.
Eva segir á bloggsíðu sinni að hún viti ekki um afdrif Hauks. „Það lítur út fyrir að hann Haukur minn sé látinn,“ segir hún. „Hvorki ég né nokkur annar af nánustu aðstandendum fékk neina tilkynningu og ég hef enn ekki náð sambandi við neinn sem veit meira en það sem komið hefur fram opinberlega. Margir hafa lýst undrun sinni á því að fréttinni hafi verið dreift á samfélagsmiðlum án þess að við værum látin vita en kommon, það er ekki við því að búast að nokkrum detti í hug að samtök setji slíka frétt á netið, 10 dögum eftir atburðinn, án þess að hafa samband við fjölskylduna.“
Bláókunnugt fólk sýnir samhug
Íslenska utanríkisráðuneytið er í sambandi við ræðismann Íslands í Tyrklandi, alþjóðadeild lögreglunnar og fleiri stofnanir, að sögn Evu.
Fjöldi fólks hefur verið í sambandi við Evu vegna málsins til að votta henni samúð sína. „Fjöldi manns hefur haft samband við mig, sent kærleikskveðjur og boðið fram aðstoð, líka bláókunnugt fólk. Þótt ég sé ekki búin að svara öllum þykir mér vænt um að finna þennan samhug og mun svara þegar þar að kemur.“
Eva biður um upplýsingar á netfangið sitt, eva.evahauksdottir@gmail.com. „Ef einhver veit eitthvað sem getur varpað ljósi á það sem gerðist eða hvað annað hann Haukur minn var bardúsa síðasta árið, sendið mér þá tölvupóst á netfangið eva.evahauksdottir@gmail.com. Ekki senda þessháttar upplýsingar á Facebook því FB póstur getur auðveldlega farið fram hjá mér.“
Barðist fyrir hælisleitendur
Haukur hafði áður dvalist í Grikklandi, en tók síðan þátt í baráttunni um frelsun Raqqa, yfirlýstrar höfuðborgar Íslamska ríkisins, samkvæmt frásögn liðsfélaga hans. Hann var sagður hafa leitt herdeild kúrdísk-sýrlenskra uppreisnarmanna gegn liðsmönnum Íslamska ríkisins. Orrustan, sem nefnd hefur verið Orrustan mikla af Kúrdum, hófst 6. júní 2017 og lauk 17. október með sigri Kúrda, eða YPG, sem og bandamanna þeirra í hinum fjölþjóðlega og fjölmenningarlega lýðræðisher Sýrlands. Svo fór í janúar að Tyrkir, með ákvörðun forsetans Receps Erdogans, lýstu yfir stríði á hendur YPG og flokkuðu þá undir hryðjuverkasamtök sem styddu frelsishreyfingu Kúrda, Kúrdíska verkamannaflokkinn PKK. Umdeild innrás Tyrkja í Sýrland hófst í kjölfarið.
Í vestrænum löndum hefur YPG hins vegar verið sagt einn öflugasti andstæðingur Íslamska ríkisins, sem staðið hefur fyrir hryðjuverkum og morðum í hinum vestræna heimi, sem og í Miðausturlöndum.
Kúrdar hafa barist fyrir svokölluðu Rojava-verkefni í áraraðir, sem snýst um að koma á lýðræðislegu bandalagi Kúrda þvert á þjóðríki, með þeim hætti að samfélög skipuleggi sig sjálf og starfi á flötum grunni. Kúrdar hafa skipulagt sín eigin svæði í Tyrklandi í mörg ár og síðar í Sýrlandi eftir að stríðið hófst.
Í reynd hafa verið starfrækt sjálfsstjórnarríki í Norður-Sýrlandi á vegum Kúrda og bandamanna þeirra undir nafni Rojava. Meðal annars hefur verið sett stjórnarskrá með ákvæðum um réttindi minnihlutahópa og jafnrétti kynjanna, sem og beinu lýðræði. Þar er einnig herskylda við lýði á vegum YPG.
Vakti athygli í Búsáhaldabyltingunni
Haukur vakti athygli í mótmælunum í kjölfar bankahrunsins 2008, meðal annars þegar hann flaggaði Bónusfána á þinghúsinu til að vekja athygli á samkrulli stjórnmála og viðskiptalífs.
„Hann gerir í raun fátt annað en að hjálpa fólki“
Þegar hann var handtekinn tveimur vikum síðar safnaðist fjöldi fólks fyrir framan lögreglustöðina á Hverfisgötu og sýndi honum stuðning. Undanfarin ár hefur hann varið tíma í Grikklandi og aðstoðað flóttafólk sem hefur leitað til Evrópu frá Miðausturlöndum og Afríku. Haukur hefur einnig barist fyrir réttindum hælisleitenda á Íslandi. „Hann gerir í raun fátt annað en að hjálpa fólki og berjast fyrir réttindum þeirra sem standa höllum fæti. Í raun hefur líf hans fyrst og fremst snúist um þetta,“ segir áhyggjufullur vinur Hauks sem Stundin ræddi við.
Á meðal þeirra sem Haukur hefur hjálpað eru Paul Ramses og Rosemary Atieno sem búa í Hafnarfirði ásamt tveimur börnum sínum, þeim Fídel Smára og Rebekku Chelsea. Þegar til stóð að senda Ramses til Ítalíu árið 2008 án þess að umsókn hans um hæli hefði verið tekin til efnismeðferðar á Íslandi brutu þeir Haukur Hilmarsson og Jason Thomas Slade sér leið inn á Keflavíkurflugvöll og stöðvuðu tímabundið flugvélina sem átti að ferja Ramses. Málinu lyktaði þannig að dómsmálaráðuneytið dró brottvísun Ramses til baka og gerði honum kleift að koma aftur til landsins. „Þeir voru að berjast fyrir réttlæti og mér fannst þeir vera með ljónshjörtu, vegna þess að á þessum tíma virtist enginn nenna að hlusta. Þannig að ég hef alltaf verið þeim mjög þakklátur fyrir að hafa staðið fyrir það sem þeir töldu rétt,“ sagði Paul Ramses í viðtali við DV árið 2013 og bætti við að með þessu hefðu Haukur og Jason bjargað lífi hans, án þess þó að hafa nokkurn tímann þekkt hann.
Athugasemdir