„Ég hef verið að melta þetta út vikuna og fylgjast með hvernig þetta hefur þróast og mér finnst eiginlega standa upp úr að það eru þarna uppi mjög ósanngjarnar ásakanir um að það hafi verið eitthvað óeðlilegt við þá ákvörðun að vísa Eyþóri frá. Mér finnst það bara ótækt að það sé látið liggja í loftinu,“ segir Halldór Auðar Svansson, borgarfulltrúi Pírata, um ástæður þess að hann sendi öllum borgarfulltrúum Reykjavíkurborgar og þingmönnum Reykjavíkurkjördæmanna ansi harðort bréf fyrr í dag. Í bréfinu fer hann meðal annars fram á að Guðlaugur Þór Þórðarson utanríkisráðherra sendi frá sér opinberlega afsökunarbeiðni og að Katrín Jakobsdóttir forsætisráðherra sendir frá sér yfirlýsingu um málið. „Öðrum kosti mun ég ekki mæta á frekari fundi með fulltrúum ríkisstjórnarinnar og stjórnarflokkanna í mótmælaskyni, þar sem ég sé engan tilgang í að eyða dýrmætum tíma mínum í fundi þar sem ég tel ekkert traust ríkja,“ segir Halldór í bréfinu.
Eins og kunnugt er vísaði Dagur B. Eggertsson borgarstjóri Eyþóri Arnalds, oddvita Sjálfstæðisflokksins fyrir komandi borgarstjórnarkosningar, af fundi sem haldinn var í Höfða á mánudag. Í Morgunblaðinu, sem er meðal annars í eigu Eyþórs, hefur Dagur verið harðlega gagnrýndur fyrir að vísa Eyþóri af fundinum. Halldór segir í bréfinu að fundur sem eigi að vera samráðsvettvangur borgarstjórnar og þingmanna um hagsmuni borgarbúa hafi snúist upp í fjölmiðlaskrípaleik um persónur í kosningaslag.
„Að það sé gert eitthvað tortryggilegt og blandað í einhvern kosningaslag, það finnst mér fullkomlega óeðlilegt og óviðeigandi.“
„Þessir fundir eru árlegir og eru alltaf með því formi að þetta eru borgarfulltrúar og þingmenn Reykjavíkurkjördæmanna og þetta er eitthvað sem allir vita að er fundarformið, sérstaklega það fólk sem hefur setið þessa fundi oft. Það er aldrei á nokkrum tímapunkti nefndur sá möguleiki að það sé verið að draga eitthvað utanaðkomandi fólk inn í hópinn. Þannig mér finnst það fullkomlega eðlileg viðbrögð að þegar það dúkkar allt í einu upp, þegar fundur er að hefjar, að það sé bara áréttað hverjum er boðið og viðkomandi bara vísað frá. Ef ég hefði til dæmis vitað af þeim möguleika að taka fleira fólk með mér þá hefði ég kannski sent einhvern í minn stað til dæmis, því ég gat ekki setið nema hálfan fundinn. Þannig þetta er spurning um jafnræði og eðlilegt vinnulag. Að það sé gert eitthvað tortryggilegt og blandað í einhvern kosningaslag, það finnst mér fullkomlega óeðlilegt og óviðeigandi,“ segir Halldór.
Um ástæðu þess að hann krefst yfirlýsingar frá forsætisráðherra segir Halldór að þau þrjú hafi skipulagt fundinn, borgarstjóri, utanríkisráðherra og forsætisráðherra. „Og hún hefur ekki sagt neitt ennþá um hennar skilning á þessum fundi,“ segir hann. „Þannig mér finnst bara mjög mikilvægt að allir sem koma að þessu og bera ábyrgð á fundarforminu, og að það fari eðlilega fram, árétti bara einfaldlega hverjar reglurnar eru og að allt hafi farið þarna eðlilega fram.“
Hér er bréf Halldórs í heild:
Sæl öll,
Á meðan ég þakka fyrir góðan fund vil ég gera alvarlega athugasemd við framferði utanríkisráðherra, sem samkvæmt neðangreindu fundarboði var í samráði við þann sem boðaði fundinn, borgarstjóra, um upplegg fundarins og fundartíma. Slík skeytasending er nokkuð sem ég vildi ekki þurfa að verja tíma mínum og ykkar í en ég tel það nauðsynlegt í ljósi stöðunnar.
Eins og fram hefur komið í fjölmiðlum hefur utanríkisráðherra kosið að taka þátt í opinberu upphlaupi í kringum þá staðreynd að manni sem hann ákvað að taka með sér á fundinn, að öðrum fundargestum algjörlega forspurðum, hafi verið vísað á dyr, þar sem honum var einfaldlega ekki boðið. Þetta hefur sá maður, auk utanríkisráðherra, kosið að útmála sem afskaplega ósanngjarna ákvörðun af hálfu fundarstjórans, borgarstjóra.
Þannig hefur fundur sem ætlað er að vera samráðsvettvangur borgarstjórnar og þingmanna um hagsmuni borgarbúa farinn að snúast upp í fjölmiðlaskrípaleik um persónur í kosningaslag.
Ég hef engar áhyggjur af því að þetta muni verða Sjálfstæðisflokknum til nokkurs framdráttar í kosningabaráttunni í borginni en ég hef hins vegar miklar áhyggjur af hvað þetta þýðir fyrir fundarformið, að þarna sé því vísvitandi rænt í þágu annarlegra hagsmuna. Tel ég að þetta framferði hafi stórskaðað trúverðugleika fundarins og að í því felist hrein og klár vanvirðing í garð annarra fundargesta, sem og borgarbúa. Traustið hefur verið eyðilagt og tíma fólks sóað í að eltast við eitthvað sem það bjóst alls ekki við að þurfa að eltast við, ómálefnaleg aukaatriði og kjánalæti. Þetta framferði sæmir einfaldlega ekki fullorðnu fólki - og alls ekki fólki sem gegnir ábyrgðarstöðum.
Ég mætti sjálfur í seinna fallinu á fundinn þar sem ég var að klára annan fund - en ég hefði sjálfur gert athugasemd við það ef maður hefði fengið að sitja fundinn einungis vegna þess að einn fundargesta var svo ósvífinn að láta sér detta það í hug að taka gest með sér án þess að spyrja kóng né prest. Það er enn alvarlega þegar umræddur gestur er einn þeirra sem er í samráði við þann sem boðar fundinn um form hans. Er treyst fyrir því en kýs að bregðast því trausti algjörlega með því að koma í bakið á öðrum fundargestum.
Ef opna á form fundarins þannig að fólki sé leyft að taka með sér gesti þarf það einfaldlega að gerast með formlegum hætti þar sem jafnræðis er gætt og öllum gefinn kostur á því með réttum fyrirvara. Það sem á hins vegar alls ekki að gera er að verðlauna fólk fyrir ósvífni og yfirgang. Það er fullkomlega eðlilegt að fólki séu þá frekar sett skýr og heilbrigð mörk og það er hlutverk fundarstjóra. Þarna var farið yfir mörk, það er kjarni málsins, og það þarf að viðurkennast opinberlega. Eitt er að fara fram úr sér en annað er að útmála sig sem fórnarlamb þegar manni eru sett eðlileg mörk. Það er fyrst þá sem maður er að stimpla sig inn sem yfirgangssegg. Tel ég þar mál að linni. Heiður okkar allra og traust okkar á milli er að veði en skömmin er utanríkisráðherra og þeirra sem meðvirkir eru með óboðlegu framferði hans.
Fer ég fram á að utanríkisráðherra biðjist opinberlega afsökunar á þessu framferði sínu og viðurkenni að hann hafi farið fram úr sér.
Einnig fer ég fram á að að forsætisráðherra, sem verkstjóri ríkisstjórnarinnar og þriðji skipuleggjandi fundarins, tjái sig opinberlega um málavöxtu og standi með formi fundarins í því skyni að endurreisa trúverðugleika hans.
Öðrum kosti mun ég ekki mæta á frekari fundi með fulltrúum ríkisstjórnarinnar og stjórnarflokkanna í mótmælaskyni, þar sem ég sé engan tilgang í að eyða dýrmætum tíma mínum í fundi þar sem ég tel ekkert traust ríkja.
Kær kveðja,
Halldór
Athugasemdir