Glitnir HoldCo áfrýjaði í dag til Landsréttar dómi Héraðsdóms Reykjavíkur í lögbannsmálinu gegn Stundinni og Reykjavík Media. Ólafur Eiríksson, lögmaður þrotabús Glitnis, staðfesti þetta í samtali við RÚV í dag. Lögbannið verður þannig áfram í gildi á meðan málið er rekið á næsta dómstigi.
Héraðsdómur Reykjavíkur synjaði þann 2. febrúar síðastliðinn öllum kröfum Glitnis HoldCo í málinu, en þrotabúið krafðist þess að lögbann sem Sýslumaðurinn á höfuðborgarsvæðinu setti á fréttaflutning fjölmiðlanna í október yrði staðfest með dómi og að fjölmiðlunum yrði gert að að afhenda Glitni gögn sem þeir hafa undir höndum eða afrit af þeim. Glitnir HoldCo fékk þá þrjár vikur til þess að áfrýja málinu og var ljóst að lögbannið yrði enn í gildi, þrátt fyrir dóm Héraðsdóms, á meðan sá frestur leið undir lok. Ekki er enn komin reynsla á málsmeðferðartíma hjá Landsrétti og því óljóst hvenær niðurstöðu verður að vænta þaðan eða hve lengi lögbannið verður áfram í gildi. Niðurstöðu Landsréttar er síðan hægt að áfrýja til Hæstaréttar.
Málið varðar umfjöllun sem birtist á vef og blaði Stundarinnar dagana 6. til 16. október síðastliðinn og unnin var í samstarfi við breska dagblaðið The Guardian og Reykjavik Media. Um var að ræða ítarlegar fréttaskýringar um viðskipti Bjarna Benediktssonar, þáverandi forsætisráðherra, og fjölskyldu hans í kringum bankahrunið 2008. Kom meðal annars fram að Bjarni Benediktsson hefði selt allar eignir sínar í Sjóði 9 hjá Glitni dagana 2. til 6. október 2008 og að faðir hans hefði verið leystur undan sjálfskuldarábyrgð hjá bankanum skömmu fyrir hrun. Fram kom að Bjarni hefði verið losaður undan 50 milljóna kúluláni sem hann hafði tekið persónulega hjá Glitni og skuldin færð yfir á eignarhaldsfélag föður hans, Hafsilfur ehf.
Í dómi héraðsdóms segir meðal annars: „Óumdeilt er að þungamiðja þeirrar umfjöllunar voru þátttaka þáverandi forsætisráðherra í ýmsum viðskiptum sem og einstaklinga og lögaðila sem tengdust honum. Lutu upplýsingarnar sem greint var frá í umfjölluninni fyrst og fremst að fjárhagsmálefnum þeirra og innbyrðis samskiptum sem og samskiptum við bankann, Glitni hf.“
Hér má lesa dóm Héraðsdóms í heild.
Fyrirvari: Fjölmiðillinn Stundin er aðili að málinu.
Athugasemdir