„Það eina sem ég vil er að fá að búa áfram á Íslandi og fá að halda áfram að læra matreiðslu,“ segir Chuong Le Bui, sem hefur verið matreiðslunemi við veitingastaðinn Nauthól í tvö ár, en henni verður vísað úr landi á grundvelli nýrra útlendingalaga sem tóku gildi um síðustu áramót. Nýju útlendingalögin gera ekki ráð fyrir að þeim sem leggi stund á iðnnám hér á landi fái dvalarleyfi vegna náms, líkt og fyrri lög gerðu.
Inga Lillý Brynjólfsdóttir, lögmaður Chuong, segir námsmannaleyfin þannig að sækja þurfi um nýtt dvalarleyfi fyrir hvert misseri. Það skrítna í málinu sé að Chuong hafi fengið útgefið leyfi í febrúar, eftir að ný lög tóku gildi, en fái synjun núna í október á grundvelli nýrra laga. Ákvörðun Útlendingastofnunar hefur nú verið kærð til kærunefndar útlendingamála.
„Hún er okkar besti nemi, að öðrum ólöstuðum, og nokkuð ljóst að hér er á ferðinni efni í frábæra matreiðslukonu,“ segir Björn Ingi Björnsson, yfirmatreiðslumaður á Nauthól. Hann segist ekki geta túlkað þessi lög öðruvísi en að þau gengisfelli iðnmenntun og að hún sé minna virði en háskólagráður. Hann hallist hins vegar að því, og segist vona, að um mistök við lagabreytingu sé að ræða. „Mistök sem eru samt grafalvarleg eins og sjá má á þessu máli og geta haft gríðarlegar afleiðingar fyrir fólk sem hefur hafið nám sitt hér með réttmætar væntingar um að fá að ljúka því.“
Tvö ár út um gluggann
Chuong er víetnamskur ríkisborgari. Hún er nú hálfnuð með lögbundinn námssamning sinn í matreiðslunámi og er á fyrstu önn í Menntaskólanum í Kópavogi. Björn telur að með ákvörðun sinni sé Útlendingastofnun að neyða Chuong til að kasta tveimur árum af ævi sinni út um gluggann. „Tveimur árum þar sem hún hefur lagt mjög hart að sér við að ná sínum markmiðum og uppfylla sinn draum um að verða matreiðslukona. Það vita allir sem það hafa reynt að það að læra að vera alvöru matreiðslumaður kostar blóð, svita og tár. Starfsnámið er mjög erfitt og krefjandi og margir sem hefja það gefast upp. Svo ekki sé minnst á að Chuong hefur ekki íslensku sem móðurmál og hefur sótt námskeið utan vinnu til að fá betri grunn fyrir bóklega námið sem fer allt fram á íslensku. Stundar hún námið sitt af alúð samkvæmt upplýsingum frá Menntaskólanum í Kópavogi þar sem hún er nú á sinni fyrstu önn. Hún mætir vel og er til fyrirmyndar enda afar einbeitt í sínu námi,“ segir Björn Ingi.
„Hún er okkar efnilegasti nemi og á framtíðina fyrir sér í þessu fagi og því er það glapræði að það skuli vera eyðilagt með þessari brottvísun.“
Hann segir undarlegt að þeim sé gert að rifta lögbundnum námssamningi til fjögurra ára, og um leið missa frábæran starfskraft sem dýrmætur tími og vinna hafi farið í að þjálfa, á sama tíma og nánast ómögulegt sé að fá faglærða starfsmenn í greinina. „Við á Nauthól leggjum mikinn metnað í að útskrifa topp fagmenn frá okkur sem hafa víðtæka reynslu og eru tilbúnir í öll þau verk sem faglærður matreiðslumaður þarf að kunna. Hefur Chuong staðist allar okkar kröfur og væntingar um góða starfshætti og vinnubrögð. Hún er okkar efnilegasti nemi og á framtíðina fyrir sér í þessu fagi og því er það glapræði að það skuli vera eyðilagt með þessari brottvísun og með þessum óréttláta hætti,“ segir hann.
Björn Ingi segir Chuong vera mikilvægan part af liðinu á Nauthóli og að hún hafi átt þátt í að þróa rétti sem prýða matseðil veitingahússins sem hafi vakið mikla lukku. „Hún hefur verið okkur innblástur þegar hún hefur sýnt okkur matreiðslu frá sínu heimalandi sem er okkur framandi. Hún er líka vinur okkar og samstarfsfélagi. Þessi brottvísun Útlendingastofnunnar er okkur öllum því mikið áfall og mikill skaði fyrir okkur og fyrirtækið í heild sinni að missa hana.“
Athugasemdir