Karlmennskan er mér afar hugleikin. Ég er oftast meðvitaður um hugmyndir mínar og samfélagsins til karlmennsku, og reyni meðvitað að vinna gegn þeim. Stundum vefst karlmennskan þó fyrir mér og ég hrúta yfir mig. Oftast nær er það í samskiptum við maka minn, sem ég virði og elska. Það er auðvitað aldrei illa meint.
Pabbinn sem vill ekki að nýfæddur sonur hans klæðist bleiku er ekki að meina neitt illt. Kennarinn sem spyr hvort strákarnir séu ekki bara skotnir í stelpunum sem þeir voru að meiða í frímó, er ekki illa meinandi. Kærastinn sem skrifar: „Hvernig landaði ég þessari gyðju?“ undir mynd af kærustunni sinni á Instagram er pottþétt ekki að meina neitt illt. Sambýlismaðurinn sem telur sig vera að gera konunni sinni greiða með því að „taka þátt“ í hversdagslegum heimilisstörfum, er eflaust ekki illa meinandi. Heldur ekki eiginmaðurinn sem vaknar aldrei á nóttunni með ungabarninu eða skiptir aldrei um kúkableyju. Eða kærastinn sem gefur kærustu sinni fyrirmæli um að drekka ekki of mikið, spyr hversvegna hún sé svona mikið máluð þegar hún fer að hitta stelpurnar. Menn sem efast um að kona sé að segja alveg rétt til um ofbeldið sem hún varð fyrir, eru eflaust ekkert að meina neitt illt þegar þeir segja: „Það þarf nú tvo til að dansa tangó“. Mennirnir sem myrtu konur á árinu voru kannski ekkert illa meinandi.
Síðustu mánuði hafa konur, hver á eftir annarri stigið fram og lýst ofbeldi sem þær hafa orðið fyrir af hendi karlmanna. Oft manna sem þóttust elska þær eða þær báru traust til. Sjáiði bara tölur úr skýrslu Stígamóta*.
Þessar tölur eru ekki svona af tilviljun. Það þarf staðfasta afneitun til að sjá ekki að á bakvið þessar tölur liggur kerfisbundin rotþró. Innræting á kvenfjandsamlegum viðhorfum og óþroskaðar hugmyndir um karlmennskuna leiða af sér hatur á konum. Ekkert endilega meðvitað. Þess vegna er svo mikilvægt að við endurskoðum hugmyndir okkar um karlmennskuna. Nýtum lærdóminn af uppreist æru, falli ríkisstjórnarinnar og umræðunni sem hefur verið hávær síðast liðnar vikur og mánuði. Tökum ábyrgð á hegðun okkar og viðhorfum og hættum að láta eins og allt sé bara í himnalagi. Hvað er það annars sem fær karlmenn til að áreita, nauðga og drepa konur?
Athugasemdir