Rósa Björk Brynjólfsdóttir, fyrrverandi þingmaður Vinstri grænna sem gekk til liðs við Samfylkinguna árið 2020, hefur tilkynnt um formannsframboð í VG.
Svandís Svavarsdóttir formaður hefur ákveðið að halda ekki áfram þegar landsfundur flokksins fer fram í byrjun mars.
Rósa kveðst vilja bregðast við bakslagi í umhverfismálum, jafnréttismálum, mannréttindamálum og „forherðingu í útlendingamálum“.
Hún segir að í hægri slagsíðu íslenskra stjórnmála sé „nauðsynlegt að til staðar sé stjórnmálaafl msem veitir öfluga viðspyrnu frá vinstri“.
Rósa sagði sig úr Vinstri grænum árið 2020 eftir að egypsk flóttafjölskylda var flutt úr landi.
Hér er tilkynning Rósu í heild sinni.
Eftir fjölmörg samtöl við félaga mína hef ég tekið þá ákvörðun um að bjóða fram krafta mína til forystu Vinstri hreyfingarinnar- græns framboðs á landsfundi í byrjun mars.
Við í Vinstri grænum stöndum á tímamótum nú þegar við kjósum okkur nýja forystu. Við þau tímamót er einstakt tækifæri til að blása lífi í stefnumál og hugmyndafræði sem skipta okkur öll svo miklu máli, skerpa þau og jafnvel endurskapa.
Við sjáum og upplifum bakslag í umhverfismálunum, jafnréttismálum og mannréttindamálum, og erum að horfa upp á ótrúlega forherðingu þegar kemur að útlendingamálum hér á landi. Ég heyri ákall eftir skýrri rödd sem veitir bakslaginu viðnám og fólk vill líka finna að það er til staðar framtíðarsýn sem byggir á von og fjölbreyttum tækifærum í samfélaginu. Að til staðar sé sameinandi rödd en ekki sundrandi og útilokandi.
Mín áherslumál ef ég næ kjöri sem formaður VG eru að styrkja og skerpa málflutning okkar í umhverfismálunum og standa styrkan vörð um mannréttindamálin. Vinna gegn vaxandi misskiptingu og fátækt og halda á lofti áherslum friðar og meiri samvinnu við líkt þenkjandi ríki á alþjóðasviðinu.
Undanfarnar vikur er ég búin að eiga góð samtöl við félaga mína í VG um allt land og ég finn að fólk saknar að haldið sé kröftugar á lofti sjónarmiðum umhverfisverndar og mannréttinda.
Það er einnig ljóst að félagshyggjufólk, í mörgum flokkum, þyrstir í afdráttarlausa afstöðu til þeirra vandamála sem stjórnmálin standa frammi fyrir. Þar sem spyrnt er fótum við mismun í samfélaginu og sundrandi orðræðu. Í hægrislagsíðu íslenskra stjórnmála er nauðsynlegt að til staðar sé stjórnmálaafl sem veitir öfluga viðspyrnu frá vinstri.
Nú skulum við styrkja okkur um land allt og opna dyrnar fyrir nýjum félögum og ferskum vindum. Við skulum efla sjálfstraustið og horfa til framtíðar saman.
Á morgun hefst spennandi forval hjá VG í Reykjavík fyrir sæti á sameinuðu framboði með Vori til vinstri fyrir borgarstjórnarkosningarnar. Við erum að klára framboðslista á Akureyri, í Múlaþingi og í Norðurþingi og vonandi í Borgarbyggð, í Skagafirði og í Hafnarfirði líka.
Ég er einlæglega spennt og hlakka mikið til að fara í uppbyggingu og viðspyrnu VG. Þar hef ég kynnst mörgu frábæru fólki og kærum vinum í gegnum tíðina; enda segi ég oft að klárasta og fyndnasta fólkið sé samankomið í þessari hreyfingu.
Það verða brekkur og stundum súld, en sólardagarnir verða frábærir og miklu fleiri!
Áfram gakk og áfram VG !
Athugasemdir (1)