Donald Trump forseti sagði í dag, jóladag, að bandarískar hersveitir hefðu gert banvænar árásir á „óþverra“ Íslamska ríkisins í norðvesturhluta Nígeríu og hét fleiri árásum ef vígamennirnir héldu áfram að drepa kristna.

Æðsti yfirmaður heraflans sagði, án þess að gefa upp nánari upplýsingar, að „stríðsmálaráðuneytið hefði framkvæmt fjölmargar fullkomnar árásir“ á jóladag gegn skotmörkum Íslamska ríkisins.

„Ég hef áður varað þessa hryðjuverkamenn við því að ef þeir hættu ekki að slátra kristnum yrði þeim refsað grimmilega, og í kvöld varð það raunin,“ birti Trump á samfélagsmiðlinum sínum Truth Social.

„Guð blessi herinn okkar,“ sagði hann og bætti ögrandi við: „GLEÐILEG JÓL til allra, þar á meðal hinna látnu hryðjuverkamanna, sem verða mun fleiri ef slátrun þeirra á kristnum heldur áfram.“

Afríkustjórn Bandaríkjahers sagði í færslu á X að hún hefði gert árás „að beiðni nígerískra yfirvalda ... og fellt marga hryðjuverkamenn Íslamska ríkisins.“

Pete Hegseth, yfirmaður Pentagon, hrósaði á X viðbúnaði ráðuneytis síns til aðgerða í Nígeríu og sagðist vera „þakklátur fyrir stuðning og samvinnu nígerískra stjórnvalda.“

Árásirnar eru þær fyrstu sem bandarískar hersveitir gera í Nígeríu undir stjórn Trumps og koma í kjölfar þess að repúblikaninn gagnrýndi vestur-afríska ríkið óvænt í október og nóvember og sagði að kristnir þar stæðu frammi fyrir „tilvistarógn“ sem jafngilti „þjóðarmorði“ innan um hin fjölmörgu vopnuðu átök í Nígeríu.

Sumir fögnuðu þessari diplómatísku sókn en aðrir túlkuðu hana sem svo að hún ýtti undir trúarbragðaspennu í fjölmennasta landi Afríku, sem hefur áður orðið fyrir barðinu á ofbeldi milli trúarhópa.

Ríkisstjórn Nígeríu og óháðir sérfræðingar hafna því að setja ofbeldið í landinu í samhengi við trúarofsóknir, nokkuð sem kristnir hægrimenn í Bandaríkjunum og Evrópu hafa lengi talað fyrir.