Hlutfall aldraðra vex hratt, sjúkdómsbyrði eykst og möguleikar á lækningu sömuleiðis. Ekki er raunhæft að mæta þessari áskorun eingöngu með því að fjölga heilbrigðisstarfsfólki. Þetta kemur fram í nýrri mönnunarstefnu í heilbrigðisþjónustu til ársins 2030.

Mönnunarstefnan byggir á heilbrigðisstefnu til ársins 2030 en fjallar með nánari hætti um mönnun í heilbrigðisþjónustu. Í heilbrigðisstefnunni kemur meðal annars fram að undanfarin ár hafi verið vandkvæðum bundið að manna stöðugildi og því sé aðkallandi að leita leiða til að fjölga heilbrigðisstarfsfólki. Í kafla heilbrigðisstefnunnar sem ber heitið Fólkið í forgrunni kemur fram að til að tryggja megi sem best gæði þjónustunnar, öryggi sjúklinga og skynsamlega notkun fjármuna, þurfi fjöldi starfsfólks að vera í samræmi við umfang og eðli þjónustunnar og aðstæður hverju sinni. 

Greining og ráðstafanir

Markmið mönnunarstefnunnar eru meðal annars þau að árið 2030 hafi mannaflaþörf heilbrigðiskerfisins verið greind og viðeigandi ráðstafanir gerðar af hálfu ríkisvaldsins til að tryggja mönnun í heilbrigðisþjónustunni. Þá er í fjármálaáætlun hins opinbera fyrir árin 2024 2028 tekið fram að ein stærsta áskorun í heilbrigðisþjónustu sé mönnun og er þar lögð áhersla á að brugðist sé við því.

Þá kemur fram að heilbrigðisstarfsfólki hefur fjölgað og enn stefnir í talsverða fjölgun meðal hjúkrunarfræðinga, lækna og fleiri heilbrigðisstétta vegna fjölgunar á námsplássum hér á landi. Óvíst er hvert hlutfall starfandi fólks gagnvart fjölda aldraðra hér á landi verður á næstu áratugum þar sem margir flytja til Íslands frá öðrum löndum til að starfa hér á landi.

Þróun, nýsköpun og tækni

Til að ná nauðsynlegri mönnun í heilbrigðisþjónustunni til framtíðar þurfi bæði að tryggja nægt framboð heilbrigðisstarfsfólks og horfa til allra þeirra þátta sem hafa áhrif á mönnunarþörf. Það eru þættir eins og endurskoðun á skipulagi við veitingu heilbrigðisþjónustu, skynsamleg verkaskipting milli heilbrigðisstétta og samvinna ýmissa faghópa, aukinn sveigjanleiki, þróun rafrænnar skráningar, nýsköpun og tækniframfarir. 

Markmið mönnunarstefnu í heilbrigðisþjónustu er einnig að tryggja sjálfbærni á Íslandi í mönnun heilbrigðisþjónustu til framtíðar, sem og að byggja upp öflugan og vel menntaðan hóp heilbrigðisstarfsfólks með starfsleyfi embættis landlæknis og veita heilbrigðisþjónustu sem uppfyllir markmið laga, um gæði og öryggi sjúklinga.

Lögð er sérstök áhersla á að nám heilbrigðisstarfsfólks á Íslandi þróist sífellt í samræmi við framfarir í vísindum og áhersla sé lögð á gæði klínískrar kennslu á heilbrigðisstofnunum. Áfram þurfi að byggja upp öfluga þekkingu og reynslu í klínískri þjálfun meðal kennara, leiðbeinenda og handleiðara á heilbrigðisstofnunum og í hermisetrum. Varðandi framboð á fag- og sérfræðimenntun heilbrigðisstétta hér á landi skal lögð áhersla á að það nám sem hér verður boðið upp á uppfylli faglegar alþjóðlegar kröfur. Loks skuli lögð áhersla á formlegt samstarf við nágrannaþjóðir um aðgengi að fag- og sérfræðimenntun sem ekki er raunhæft að bjóða upp á hérlendis sökum fámennis.

Mönnunarstefnuna í heild sinni má lesa hér.