Þorgerði Katrínu Gunnarsdóttur, formanni Viðreisnar, svelgdist á kaffibollanum um helgina þegar hún heyrði Bjarna Benediktsson forsætisráðherra segjast vera svekktur yfir háum vöxtum í viðtali við RÚV. Í viðtalinu sagði Bjarni það áhyggjuefni að heimilin væru að segja sig úr lögum við vaxtaákvarðanir Seðlabankans sem birtist í því að heimilin hafi sagt skilið við óverðtryggð lán.
Þorgerður Katrín spurði Bjarna nánar út í vaxtaákvarðanir Seðlabankans í óundirbúnum fyrirspurnartíma á Alþingi fyrir hádegi út í „Við verðum líka að hafa það í huga að heimilin sem hann hefur áhyggjur af sem eru að fara í verðtryggðu lánin að þau eru að leita skjóls, leita skjóls undan ofríki íslensku krónunnar, en líka undan þeirri efnahagsstjórn sem hefur verið og það er ósköp eðlilegt að þau leiti allra leiða,“ sagði Þorgerður Katrín.
Hún spurði hvort það væri virkilega svo að stærsta áhyggjuefnið væri að heimilin séu að segja sig úr lögum varðandi vaxtaákvarðanir Seðlabankans. „Væri ekki miklu meira áhyggjuefni að Ísland er að segja sig úr lögum við siðuð samfélög þegar kemur að vöxtum, þegar kemur að verðbólgu og kemur að því að meta ábatann af menntun?“ spurði Þorgerður sem velti fyrir sér hvort Bjarni þekkti þann fjármálaráðherra sem hefur stýrt ráðuneytinu síðastliðin tíu ár, það er hann sjálfan.
Stoltur af árunum sem fjármálaráðherra
Bjarni sagði Ísland ekki vera að segja sig úr lögum við umheiminn í neinu samhengi. Hátt vaxtastig eins og er í dag væri gríðarlega alvarlegt mál en ástandið væri aðeins til mjög skamms tíma. „Þingmaður spyr hvort ég kannist við að bera einhverja ábyrgð á efnahagsmálum undanfarinn áratug. Já, ég geri það með miklu stolti,“ sagði Bjarni, og benti í framhaldinu á „mjög fagra mynd, sem meðal annars er sú að á Íslandi hefur hagvöxtur verið meiri og fleiri ný störf verið sköpuð en annars staðar.“
Þorgerður Katrín dró þá upp aðra mynd og sagði það vera ákveðna fegurð hversu önugur fjármálaráðherra væri eftir svo skamman tíma í setu. „Ég hvet hann eindregið til þess að eiga samtal við hæstvirtan fjármálaráðherra síðustu tíu ára um það að við erum með eina hæstu vexti í þeim löndum sem við viljum bera okkur saman við. Við erum í sama hópi og Rússland og Úkraína, stríðshrjáð lönd.“
Þorgerður Katrín sagðist hafa áhyggjur af millitekjuhópum sem hún telur ótækt að lendi enn og ftur í því að standa undir meginskattbyrðinni á Íslandi. „Ég vil því hvetja hæstvirtan forsætisráðherra til að skoða svolítið stóru myndina og taka utan um alla hópa, ekki bara sína eigin.“
Bjarni svaraði með því að fullyrða á þetta ár, 2024, sé það sterkasta í efnahagssögu Íslands. „Nú höldum við upp á 80 ára afmælið í sumar þar sem staða efnahagsmála var sterkari heldur en árið 2024. Þetta er sterkasta ár Íslands í efnahagssögunni, 2024, aldrei staðið betur.“
Þó ræðutími Þorgerðar Katrínar og Bjarna væri lokið héldu þau orðaskiptum áfram í þingsal þar til Oddný G. Harðardóttir, starfandi forseti Alþingis, benti þeim á að aðeins væri einn fundur í þingsalnum.
Athugasemdir (3)