Helga Árna­dóttir, fram­kvæmda­stjóri sölu-, rekstrar- og þjón­ustu Bláa lóns­ins, segir í sam­tali við Heim­ild­ina að rúm­lega hund­rað gestir og starfs­menn hafi verið staddir á hót­eli Bláa lón­ins­ins þegar svæðið var rýmt í nótt. Eldgos hófst í Sund­hnúka­gíga­röð­inni laust eftir klukkan 6 í morgun.

„Við erum bein­tengd við almanna­varna­kerfið og fáum upp­lýs­ingar eins hratt og auðið er,“ segir Helga.

Kom fólki ekki á óvart

Að hennar sögn var þetta yfir­veguð rým­ing sem þýðir að menn höfðu tíma til að pakka í töskur og ganga frá her­bergj­unum. Hún segir að ekk­ert óða­got hafi ein­kennt aðgerðir. „Enda vissum við í hvers konar jarð­hrær­ingar stefndi og hvar. Það var búið að koma fram í fjöl­miðlum dag­ana á undan að menn áttu von á gosi við Sund­hnúka­gíga­röð­ina og ef til þess kæmi þá yrði fyr­ir­var­inn til­tölu­lega stuttur. Það er akkúrat það sem raun­gerð­ist.“ Hún tekur þó fram að Bláa lónið og starfs­stöðvar þess liggi ekki einmitt á því svæði. 

Gosið kom því ekki á óvart. „Það var búið að upp­lýsa gesti fyr­ir­fram, svo þetta var ekki að koma fólki á óvart. Gestir sýndu þessu mik­inn skiln­ing og yfir­vegun.“

Spurð hvort hún hafi áhyggjur af stað­setn­ingu goss­ins segir Helga að Bláa lónið fylgi því sem komi fram hjá Veð­ur­stofu og almanna­vörnum. „Hrær­ing­arnar eru fyrst og síð­ast við Sund­hnúka­gíga­röð­ina og við erum ekki á því svæði,“ segir hún.

Í Bláa lón­inu hefur verið komið upp sam­ræmdu við­vör­un­ar­kerfi sem hægt er að setja í gang þar auk Grinda­víkur og hjá HS Orku.

Samræmdar viðvörunarflautur nýkomnar upp

Hjördís Guð­munds­dóttir, sam­skipta­stjóri almanna­varna, tekur undir það að rým­ing hafi gengið vel í Svarts­engi og hót­eli Bláa lóns­ins. „Það sem var kannski sér­stakt við þessa rým­ingu núna að það er búið að koma upp við­var­anaflautum við Bláa lónið og inni í Grinda­vík. Það var maður sem setti þær í gang og það var búið að æfa það allt saman í vik­unni,“ segir hún. 

Hjördís segir að hljóðið í við­varnaflaut­unum gæti vakið upp ein­hverjar minn­ingar í þeim sem komnir eru yfir fimm­tugt. „Þetta er sama hljóð og í loft­varn­arflaut­unum sem fólk yfir vissan aldur kann­ast eflaust vel við,“ segir hún.