„Enda veit ég ekk­ert hvernig þessi ákvörðun mun end­an­lega hafa áhrif á mitt líf til fram­tíðar,“ sagði Geir­þrúður Gunn­hild­ar­dóttir, 48 ára gömul kona, í bréfi til skurð­lækn­is­ins Aðal­steins Arn­ars­sonar sem hún hafði farið í maga­ermis­að­gerð hjá í árs­byrjun 2021. Bréfið var sent í tölvu­pósti segir hún. Heim­ildin fjallar um mál Geir­þrúðar í nýjasta tölu­blaði sínu og greinir frá upp­lifun hennar af þjón­ustu Klíník­ur­innar sem hún lýsir sem „kaldri“ og líkir við að vera í „verk­smiðju“. 

Í bréf­inu, sem hún sendi til Aðal­steins um sum­arið 2021, sagði Geir­þrúður við Aðal­stein að hann hefði ekki átt að gera skurð­að­gerð­ina á henni þar sem hún var nýbúin að grein­ast með krabba­mein þegar hún fór í hana og að afleið­ing­arnar hafi verið miklar fyrir hana:  „Á þeim tíma er ég í hálf­gerðu sjokki vegna þess að ég hafði verið greind með krabba­mein vik­una áður, sem ég sagði þér frá, og finnst mér að þú hefðir þá ekki átt að taka þá ákvörðun um að fram­kvæma þessa aðgerð.“ Hún fór svo í upp­skurð vegna krabba­meins­ins rúmum mán­uði eftir aðgerð­ina. 

Viðtalið er hluti af umfjöllun Heim­ild­ar­innar um þá þöglu einka­væð­ingu í heil­brigð­is­kerf­inu sem fer nú fram í ráð­herra­tíð Willums Þórs Þórs­sonar. Eftir að hann tók við sem heil­brigð­is­ráð­herra í lok árs 2021 hafa verið tekin ný skref í einka­væð­ingu í heil­brigð­is­kerf­inu, eins og lið­skipta­að­gerðir einka­að­ila með kostn­að­ar­þátt­töku Sjúkra­trygg­inga Íslands, og hefur Willum Þór boðað enn frek­ari breyt­ingar í þessa átt. Ein af þessum fyr­ir­hug­uðu breyt­ingum er að efna­skipta­gerðir, eins og maga­ermis­að­gerðin sem Gunn­hildur fór í, verði gerðar með kostn­að­ar­þátt­töku Sjúkra­trygg­inga Íslands af einka­fyr­ir­tækjum eins og Klíník­inni. Raunar er Klíníkin eina einka­fyr­ir­tækið sem gerir slíkar efna­skipta­að­gerðir hér á landi.  

Bað um að þurfa ekki að borga fyrir aðgerðina

Í bréf­inu fór Geir­þrúður fram á það við Aðal­stein að hún yrði ekki rukkuð fyrir aðgerð­ina þar sem hún hefði haft svo slæm áhrif á heilsu­far hennar. Geir­þrúður greiddi tæp­lega 1300 þús­und krónur fyrir aðgerð­ina en þar með var ein milljón á rað­greiðslu­láni sem hún er ennþá að borga af. Rað­greiðslu­lánið sem hún tók var til þriggja ára.

Í bréf­inu sagði Geir­þrúður um þetta: „Eftir á að hyggja var þetta mjög slæm ákvörðun, þar sem krabba­meins­með­ferðin ein og sér veldur miklum erf­ið­leikum við að nær­ast hvað þá heldur eftir maga­ermis­að­gerð­ina. Þá hefur mitt ástand verið mjög alvar­legt og ég er inniliggj­andi á spít­ala með nær­ingu í gegnum sondu. Nú er svo komið að fjár­hags­leg staða mín hefur snar­versnað vegna krabba­meins­með­ferð­ar­innar og tel ég, í ljósi aðstæðna, rétt­læt­an­legt af minni hálfu að fara fram á við þig að þú rukkir mig ekki fyrir þessa aðgerð.“

Í sam­tali við Heim­ild­ina segir Geir­þrúður að hún hafi sent bréfið nokkrum mán­uðum eftir aðgerð­ina þegar hún var byrjuð að jafn sig eftir það sjokk sem krabba­meins­grein­ingin, maga­ermin og krabba­meins­með­ferðin hafi verið í lífi. „Þarna var ég aðeins að ranka við mér,“ segir hún. 

Hún segir að svarið sem hún fékk frá Aðal­steini hafi verið stutt og að hann hafi bent henni á að tala við til­tekið trygg­inga­fé­lag vegna máls­ins.  Geir­þrúður hélt því áfram að greiða fyrir magermis­að­gerð­ina og er enn að því. Hún seg­ist ekki eiga svar­bréfið frá Aðal­steini þar sem hún hafi lík­lega eytt því. 

Fram­kvæmda­stjóri Klíník­ur­innar, Sigurður Ingi­bergur Björns­son, hefur ekki viljað veita Heim­ild­inni við­tal þrátt fyrir ítrek­aðar beiðnir um það.