Eignatekjur heimila landsins voru 81 milljarður króna á öðrum ársfjórðungi ársins 2023. Það er 31 prósent meira en þeir sem þéna tekjur af eignum sínum höfðu í slíkar á sama ársfjórðungi í fyrra. Helsta ástæðan fyrir því var rúmlega 60 prósent aukning á vaxtatekjum sem skýrast af auknu vaxtastigi, en stýrivextir Seðlabanka Íslands hækkuðu úr því að vera 2,75 prósent í byrjun annars ársfjórðungs í fyrra og í 8,75 prósent í lok sama ársfjórðungs í ár.
Þetta má lesa út úr tekjuskiptingaruppgjöri heimila landsins sem Hagstofa Íslands birti í vikunni. Eignatekjur hafa aldrei verið hærri krónutala en þær voru á þriggja mánaða tímabilinu sem hófst í byrjun apríl og lauk í lok júní síðastliðins.
Þeir sem eru með hæstu tekjurnar eiga mest af innlánum
Eignatekjur eru, líkt og nafni gefur til kynna, tekjur sem heimilin hafa af eignum sínum. Þar er um að ræða vexti, arð, söluhagnað og leigutekjur. …
Þetta eru þau sem seðlabankafólk segist vera að hvetja til að "spara" með því að hækka vexti. Þ.e.a.s. fólk sem hefur nægar tekjur til að leggja til hliðar í sparnað og hagnast nú gríðarlega á kostnað þeirra sem hafa ekki getað byggt upp sparnað heldur þurft að fjármagna húsnæðiskaup með lántöku eða eru föst á leigumarkaði með enga útgönguleið þaðan.
Enginn í seðlabankanum virðist hafa neinar áhyggjur af þeim auknu fjármagnstekjum sem þetta annars upp til hópa ágæta fólk fær nú í bílförmum og getur notað til að fjármagna aukna einkaneyslu sína með tilheyrandi áhrifum á verðbólgu.
Nei, samkvæmt kenningum seðlabankans eru það bara auknar launatekjur sem geta valdið verðbólgu en ekki auknar fjármagnstekjur... (takið smá stund til að láta það sökkva inn).