Klár mistök að Íslandsbanki seldi í sjálfum sér

Jón Guðni Ómarsson, nýr banka­stjóri Íslands­banka, segir að stjórn­endur Íslands­banka hefðu átt að gera sér ljósa hætt­una á hags­muna­á­rekstrum og orð­spors­á­hættu með því að bank­inn sjálfur tæki að sér hlut­verk sölu­að­ila á hlut rík­is­ins í bank­anum. Bankinn muni ekki koma að frek­ari sölu en Jón Guðni úti­lokar þó ekki að Íslands­banki taki að sér það hlut­verk að selja hlut rík­is­ins í Lands­bank­anum, kæmi til þess að það yrði gert.

Jón Guðni segir í við­tali við Heim­ild­ina að við frum­skrán­ingu Íslands­banka á markað hafi bank­inn sjálfur leikið stórt hlut­verk, og það verk­efni hafi gengið nokkuð vel. „Eftir það vorum við senni­lega bara of örugg með okkur hvað varðar fram­haldið. Það kemur fram í sátt­inni við Seðla­bank­ann að það hefði átt að vinna betra áhættu­mat, sem sagt ekki bara inni í þeirri ein­ingu sem vann verkið heldur hærra í bank­anum. Það er eitt­hvað sem við erum að skoða núna með ytri ráð­gjafa í þeim málum, hvernig best er að haga því til fram­tíðar.“

Jón Guðni segir einnig aðspurður að hann hafi hvorki verið spurður um sína skoðun á því að bank­inn sæi um söl­una, né hafi hann viðrað hana. „Hins vegar er það alveg aug­ljóst núna að við myndum ekki taka svona verk­efni að okkur í dag.“ 

En mynduð þið taka að ykkur verk­efni eins og að selja hluti í Lands­bank­anum til að mynda?

„Já, það er eitt­hvað sem við myndum klár­lega skoða, ein­hver þarf nátt­úr­lega að sinna slíku hlut­verki. En aftur, við erum að skoða þessa ferla heilt yfir, þannig að þegar slík mál kæmu upp á borð að þau séu þá skoðuð af stjórn­endum sem geta séð þvert yfir og metið heild­ar­á­hættu.“

Klár mistök

Hvernig stóð á því að það var ekki full­kom­lega girt fyrir það að starfs­menn bank­ans gætu tekið þátt í útboð­inu?

„Það voru einmitt klár mis­tök, eftir á að hyggja, að hafa ekki gert það. Ég held að skýr­ingin sé að hluta til sú að þegar frumút­boðið fór fram þá var reglum breytt hjá okkur þannig að starfs­menn gætu tekið þátt. Svo var þeim ekki breytt aftur áður en kom að þess­ari sölu. Útboðinu var beint að hæfum fjár­festum og ég held bara að fólk hafi verið með hug­ann við það. Þú sérð það líka að það voru innan við eitt pró­sent starfs­manna sem tóku þátt. Það var ekki verið að beina þessu sér­stak­lega að starfs­mönnum bank­ans. Æðstu stjórn­endur á þessum tíma, Birna og ég, við tókum ekki þátt. Maður hefði viljað að þetta væri gert öðru­vísi.“

Hafðir þú hug­mynda­flug til að láta þér detta í hug að stjórn­endur sviða, stjórn­ar­menn, æðstu stjórn­endur og yfir­höfuð starfs­menn bank­ans, myndu taka þátt í útboð­inu? Er það það sem klikk­aði, að fólk innan bank­ans bara ímynd­aði sér ekki að þetta gæti gerst?

„Við getum alla­vega alveg sagt það að það kom mér aðeins á óvart að það hefðu verið starfs­menn sem tóku þátt.“

Áttu við að það hafi verið þér von­brigði?

„Já, ég sá til­tölu­lega fljót­lega að það hefði verið heppi­legra að starfs­menn hefðu ekki tekið þátt.“