Óskar Sigurðsson, skiptastjóri Torgs sem var útgáfufélag Fréttablaðsins og tengdra miðla, metur nú hvort ástæða sé til þess að rifta samningi sem gerður var við félagið Hofgarða ehf. í mars 2021. Frá þessu er greint á mbl.is.

Þá keypti það félag, sem er í eigu fjárfestisins Helga Magnússonar, vörumerki fjölmiðla út úr Torgi, sem var einnig að uppistöðu í eigu Helga Magnússonar. Fyrir það segist Helgi hafa greitt 480 milljónir króna. 

Auk þess keypti dótturfélag Hofgarða dv.is, hringbraut.is og Iceland Magazine á 420 milljónir króna úr þrotabúi Torgs í lok marsmánaðar 2023, á sama tíma og þeir tilkynntu starfsfólki Torgs að félagið væri að fara í þrot og að útgáfu Fréttablaðsins yrði hætt. Fyrir liggur að sú upphæð var ekki greidd í reiðufé ef miðað er við að eignir þrotabús Torgs duga ekki fyrir forgangskröfum.

Helgi lýsti hæstu kröfunni

Fréttablaðið, sem var um árabil mest lesna dagblað landsins, hætti að koma út í lok mars á þessu ári. Útgáfufélag þess, Torg, var tekið til gjaldþrotaskipta í byrjun apríl. Heimildin greindi frá því í síðustu viku að alls hafi 1,5 milljarða króna kröfum verið lýst í búið, en einungis 16 prósent þeirra voru samþykktar, eða kröfur upp á 236,5 milljónir króna. Að uppistöðu var þar um að ræða launakröfur frá fyrrverandi starfsfólki og skuldir við lífeyrissjóði. Félag Helga Magnússonar lýsti hæstu kröfunni í búið, alls upp á 988 milljónir króna. Um almenna kröfu var að ræða og því liggur fyrir að hún fáist ekki greidd. Sömu sögu er að segja um 110 milljón króna skuld  við Skattinn, og þar með ríkissjóð. 

Í umfjöllun mbl.is kemur fram að eignir þrotabúsins nemi um 100 milljónum króna og munu því ekki duga nema fyrir broti af samþykktum forgangskröfum. Á meðal þeirra eigna er prentvél sem Torg átti og notaði til að prenta Fréttablaðið, en Mannlif.is greindi frá því í gær að Landsprent, sem heldur utan um prentsmiðju eigenda Morgunblaðsins, hefði boðið í prentvélina. 

Mikið tap og hrun í lestri

Öllum starfsmönnum Torgs, alls um 100 manns, var sagt upp störfum að morgni 31. mars síðastliðins og félagið í kjölfarið gefið upp til gjaldþrotaskipta. Það gerðist í kjölfar þess að mikið tap hafði verið á rekstri Torgs árum saman og tilraunir til að breyta dreifingu Fréttablaðsins, með því að láta fólk grípa það á fjölförnum stöðum síðdegis í stað þess að fá blaðið inn um lúguna að morgni, höfðu mistekist herfilega með þeim afleiðingum að lestur hrundi og tekjur drógust verulega saman. 

Í síðustu könnun sem Gallup gerði á lestri Fréttablaðsins, sem var fríblað sem var prentað í tugum þúsunda eintaka á dag, mældist lesturinn einungis 14,5 prósent. Þegar best lét, vorið 2007, sögðust 65,2 prósent landsmanna lesa Fréttablaðið. 

Tapið af reglulegum rekstri Torgs á þeim tíma sem Helgi Magnússon og samstarfsfélagar hans stýrðu útgáfufélaginu var gríðarlegt. Á þremur árum, frá byrjun árs 2019 og út árið 2021, var það rúmlega 1,3 milljarðar króna. Við bætist svo tap á rekstrinum á árinu 2022 og á fyrstu mánuðum ársins 2023, sem ekki hefur verið gert opinbert.