„Hvort viðskiptaverðlaun Innherja verði veitt í framtíðinni er ekki ákveðið. Ef niðurstaða okkar verður sú að efna til verðlauna þá er klárt að þau verða bæði einfaldari og smærri í sniðum.“ Þetta segir Þórhallur Gunnarsson framkvæmdastjóri miðla hjá Sýn í skriflegu svari við fyrirspurn Heimildarinnar varðandi það hvort viðskiptaverðlaun Innherja og velgjörðarfélagsins 1881 verði haldin á ný en þau voru veitt í fyrsta og eina skiptið um miðjan desember árið 2021.
Viðskiptaverðlaunin, þar sem fólk og fyrirtæki voru verðlaunuð fyrir góðan árangur, voru veitt í fimm flokkum á Hilton Nordica, auk aðalverðlauna fyrir viðskipti ársins. Þá var viðskiptamaður ársins útnefndur og sérstök heiðursverðlaun íslensks atvinnulífs afhent.
Samkvæmt frétt Innherja um verðlaunin á sínum tíma byggði dómnefndin val sitt á tillögum sem bárust frá tugum manna, stjórnendum, fjárfestum og öðrum sérfræðingum úr viðskiptalífinu. Viðskiptaverðlaunin áttu að verða árviss viðburður, þar sem allur ágóði rynni til góðs málefnis.
Umfangsmeiri en marga óraði fyrir – sambærileg hátíð ekki haldin aftur
Þórhallur segir í svari sínu að ástæðan fyrir því að ákveðið var að standa ekki aftur fyrir sambærilegri hátíð sé einfaldlega af því þeim þótti hún „óþarflega umfangsmikil og ekki í samræmi við það sem við viljum standa fyrir“.
„Innherji hóf starfsemi haustið 2021 sem viðskiptamiðill með óháðri ritstjórn og er ekki á vegum fréttastofu okkar. Miðillinn heyrir hins vegar undir fjölmiðla Sýnar. Í desember þetta ár voru viðskiptaverðlaun Innherja haldin og má segja að þau hafi verið umfangsmeiri en marga óraði.
Í framhaldinu tókum við þessa verðlaunaafhendingu til endurskoðunar og ákváðum að standa ekki aftur fyrir sambærilegri hátíð og þarna fór fram,“ segir í svari Þórhalls.
Viðskipti ársins voru hlutafjárútboð og skráning Íslandsbanka á markað
Í frétt Innherja um verðlaunin frá því í desember 2021 sagði Ólöf Skaftadóttir sem fór fyrir miðlinum á þeim tíma að löng hefð væri fyrir því hér á landi að fjölmiðlar veittu verðlaun fyrir viðskipti ársins og útnefndu viðskiptamann ársins og oft kæmu margir til greina. „Við vildum útvíkka hugmyndina og veita verðlaun í fleiri flokkum,” sagði Ólöf og tók Hörður Ægisson annar ritstjórinn undir.
Jón Sigurðsson, forstjóri Stoða, hlaut titilinn viðskiptamaður ársins og viðskipti ársins voru svo hlutafjárútboð og skráning Íslandsbanka á markað, en við verðlaununum tóku Birna Einarsdóttir, bankastjóri Íslandsbanka, Jón Gunnar Jónsson, forstjóri Bankasýslu ríkisins og Bjarni Benediktsson fjármálaráðherra.
Sérstök heiðursverðlaun íslensks atvinnulífs hlaut svo Þórður Magnússon, stjórnarformaður Eyris Invest, fyrir framlag sitt til íslensks atvinnulífs undanfarna áratugi. Kaupmaður ársins var Arnar Sigurðsson í Sante, fyrir að vera „óþreytandi í baráttu sinni“ við að koma almenningi undan einokun ríkisins á sölu áfengis. Rokkstjarna ársins var Controlant, fyrir að hafa gegnt lykilhlutverki við dreifingu á bóluefni Covid19 um allan heim og tækniundur ársins var Sidekick Health fyrir að skara fram úr í heilbrigðistækni sem sögð var bæta heilsu fólks með lífstílssjúkdóma.
Spámaður ársins var Örn Þorsteinsson hjá Akta sjóðum fyrir að skila framúrskarandi ávöxtun fyrir sjóðsfélaga með greiningu og spám sem „hafa hitt naglann á höfuðið“ og samfélagsstjarna ársins var sjávarútvegsfyrirtækið Brim fyrir víðtækan stuðning við íþróttir og æskulýðsstarf, slysavarna- og björgunarstarf, menningarstarf, nýsköpun og fræðslu.
Athugasemdir