Tap Icelandair Group á síð­asta ári nam 5,8 millj­ónum banda­ríkja­dala, jafn­virði rúm­lega 826 millj­óna króna sé miðað við gengi doll­ara gagn­vart krónu á síð­asta degi nýlið­ins árs (USD = 142,5 kr.).

Afkoma félags­ins var mun betri en árið 2021, er félagið tap­aði 105 millj­ónum dala, jafn­virði 13,7 millj­arða króna á árs­loka­gengi þess árs. Rekstr­ar­af­koma félags­ins fyrir fjár­magnsliði og skatt­greiðslur (EBIT) var jákvæð um 2,6 millj­arða króna á síð­asta ári.

Flug­fé­lagið birti upp­gjör sitt síð­degis í gær og lýsir árinu 2022 sem ári við­snún­ings, en kór­ónu­veiru­far­ald­ur­inn lék félagið eins og önnur flug­fé­lög grátt. Rekstur Icelandair hafði þó einnig verið þungur fyrir far­ald­ur­inn og flug­fé­lagið hafði tapað fé á hverju ári síðan 2018. Upp­safnað tap félags­ins síðan þá nemur sam­tals um 80 millj­örðum króna, miðað við árs­loka­gengi hvers árs, og þar af nam tapið rúmum 50 millj­örðum árið 2020.

Uppgjör Icelandair virð­ist hafa farið ágæt­lega í fjár­festa, en á öðrum tím­anum í dag hafði gengi hluta­bréfa í félag­inu hækkað um rúm 3,3 pró­sent innan dags­ins í um 2 millj­arða króna við­skiptum.

„Við höfum náð vopnum okkar“

Á síð­asta ári flutti Icelandair 3,6 millj­ónir far­þega, 2,2 millj­ónum fleiri en árið 2021, og horfa stjórn­endur félags­ins björtum augum á árið 2023, en flug­á­ætlun félags­ins hefur aldrei verið jafn umfangs­mikil með flug­fram­boð til 54 áfanga­staða. 

Staðan sé sterkBogi Nils Bogason for­stjóri lýsir árinu 2022 sem ári við­snún­ings í rekstri Icelandair Group.

Mynd: RÚV

„Sterk tekju­myndum með met far­þega­tekjum á seinni hluta árs­ins og stór­bætt EBIT hlut­fall sýnir að við­skipta­líkan félags­ins hefur enn og aftur sannað gildi sitt. Við höfum náð vopnum okkar og höldum ótrauð áfram, sterk­ari en nokkru sinni fyrr, með stærstu flug­á­ætlun í sögu félags­ins á þessu ári þegar kemur að tíðni og fjölda áfanga­staða,“ er haft eftir Boga Nils Bogasyni for­stjóra félags­ins í til­kynn­ingu.

Gengur á gjafabréfastaflann

Í upp­gjöri Icelandair kemur fram að við ára­mót hafi félagið verið búið að selja flug­miða í ferðir sem ekki enn höfðu verið farnar fyrir alls 212,3 millj­ónir banda­ríkja­dala, jafn­virði rúm­lega 30 millj­arða íslenskra króna.

Kór­ónu­veiru­far­ald­ur­inn hafði í för með sér umfangs­mikla útgáfu inn­eigna af hálfu flug­fé­lags­ins, en sá stafli hefur rúm­lega helm­ing­ast frá árs­lokum 2021. Á þeim tíma­punkti áttu við­skipta­vinir Icelandair alls 83,7 millj­ónir dala í inn­eignum hjá félag­inu án þess að vera búnir að bóka sér flug, en við árs­lok 2022 var upp­hæðin komin niður í 41,1 milljón dala, jafn­virði 5,8 millj­arða króna.

Eigið fé Icelandair Group í lok árs nam 273,4 millj­ónum doll­ara, eða 33,8 millj­örðum króna.

Meta tjón af lokun Reykjanesbrautar á milljarð

Fram kemur í yfir­lýs­ingu Boga Nils for­stjóra, sem fylgdi upp­gjörstil­kynn­ingu félags­ins, að Icelandair meti tjón sitt af skítviðr­inu sem gekk yfir í des­em­ber­mán­uði og leiddi m.a. til lok­unar Reykja­nes­brautar, á sama tíma og Kefla­vík­ur­flug­völlur var opinn, á um einn millj­arð króna. 

Bogi Nils segir að tjónið megi að lang­mestu leyti rekja til lok­unar akveg­ar­ins og segir í því ljósi „ánægju­legt og mik­il­vægt að inn­við­a­ráð­herra hafi sett af stað vinnu til að tryggja að slíkt ástand muni ekki skap­ast aftur við sam­bæri­legar veð­ur­að­stæður“.

For­stjór­inn segir ljóst að rekstr­ar­um­hverfi flug­fé­lags­ins verði „áfram krefj­andi með verð­bólgu­þrýst­ingi og hækkun launa­kostn­aðar“ en að stjórn­endur félags­ins séu „sann­færð um að eft­ir­spurn verði áfram mikil eftir ferða­lögum og að mikil tæki­færi séu fyrir Ísland sem áfanga­stað“ eins og þegar sjá­ist merki í „sterku bók­un­ar­flæði“ næstu miss­erin.