Fyrri aukaspurning.

Karlinn hér að ofan hefur stillt sér upp og snyrt sig til að líkjast sem mest heimsfrægum málara — eins og málarinn leit út á frægri sjálfsmynd sem hann málaði. Hver var málarinn?

***

Aðalspurningar:

1.  Í hvaða borg er hæsta bygging heimsins?

2.  Til hvaða ríkis telst sú borg?

3.  Hvíthærður öldungadeildarþingmaður í Bandaríkjunum vakti mikla athygli í prófkjörum Demókrata fyrir forsetakosningar 2016 og 2020. Hvað heitir hann?

4.  En fyrir hvaða ríki í Bandaríkjunum situr hann á þingi?

5.  Raunveruleikaþættir hafa verið vinsælir í sjónvarpi á Vesturlöndum og víðar, ekki síst þættir þar sem smalað er saman hópi fólks og fylgst með því leysa allskonar verkefni eða einfaldlega eiga í mis-nánum samskiptum sín á milli. Mörgum þáttum af því tagi er haldið úti í fleiri en einu landi. Grande Fratello heitir til dæmis ítalska útgáfan af þætti sem vinsæll er víða. Hvað heita þeir þættir í enskumælandi löndum?

6.  Á Megasarplötunum Loftmynd og Höfuðlausnum (1987 og 1988) settu bakraddir tveggja systra mikinn svip á útkomuna. Önnur systirin heitir Inga og hefur ekki verið mjög áberandi á tónlistarbrautinni síðan. En hvað heitir hin systirin?

7.  Hver varð sjávarútvegs- og landbúnaðarráðherra í ríkisstjórn Bjarna Benediktssonar snemma árs 2017?

8.  Hvað heitir unnusta Andrésar Andar?

9.  Árið 1996 var frumsýnd í Bandaríkjunum hryllingsmynd sem þótti ansi blóðug en þó í gamansömum tón. Þar reyndi grímuklæddur morðvargur að koma stúlku að nafni Sidney Prescott og vinum hennar fyrir kattarnef. Myndin varð mjög vinsæl, ekki síst meðal ungs fólks um heim mestallan, og síðan hafa verið gerðar þrjár framhaldsmyndir, og fimmta myndin er víst væntanleg á næsta ári. Myndirnar heita allar sama nafninu, bara með ólík númer. Og heiti þeirra er ...?

10.  Í tennisíþróttinni eru fjögur svokölluð risamót, sem helstu tennisleikarar heimsins keppast við að vinna. Grand slams eru þau kölluð á ensku. Í hvaða fjórum löndum eru þessi fjögur risamót haldin? Hér þarf að hafa þrjú rétt lönd til að fá stig. 

***

Seinni aukaspurning:

Hvað heitir persónan sem sést á myndinni hér að neðan? Altso persónan, ekki leikkonan?

***

Svör við aðalspurningum:

1.  Dubai.

2.  Sameinuðu arabísku furstadæmunum.

3.  Bernie Sanders.

4.  Vermont.

5.  Big Brother.

6.  Björk.

7.  Þorgerður Katrín.

8.  Andrésína.

9.  Scream.

10.  Mótin eru haldin í Ástralíu, Frakklandi, Bretlandi og Bandaríkjunum. Ef þið hafið þrjú rétt, þá fáiði stig, þótt það fjórða kunni að vera rangt. 

***

Svör við aukaspurningum:

Karlinn á efri myndinni líkir eftir frægri sjálfsmynd hollenska málarans Vincents Van Goghs.

Eins og sjá má.

Á neðri myndinni má hins vegar sjá lögreglumanninn Hinriku.

Hana leikur Ilmur Kristjánsdóttir í þáttaröðinni Ófærð.

***

Hér fyrir neðan eru svo hlekkir á fyrri þraut, og þá næstu er fram líða stundir.