Fyrri aukaspurning:

Hvað heitir konan á myndinni hér að ofan?

***

Aðalspurningar:

1.  Snorri Olsen heitir karl nokkur sem gegnir háu embætti hjá ríkinu. Embættið er afar nauðsynlegt, en ekki ævinlega vinsælt því Snorri er ... hvað?

2.  Í hvaða stóra vatni á Austurlandi hefur gjarnan verið sagt búa skrímsli?

3.  En hvað heitir langstærsta stöðuvatnið í Svíþjóð?

4.  Hvaða íslensk hljómsveit hefur gefið út sérstakt lag um íslenska karlmenn?

5.  Þar er meðal annars sungið: „Ef heitt er í kolunum förum við oftast úr bolnum, / ef þannig ber undir ...“ þá hvað?

6.  Leikstjóri einn bandarískur, sem gert hefur tugi kvikmynda og naut mikilla vinsælda að minnsta kosti til skamms tíma, hann hefur á síðustu árum verið ásakaður fyrir kynferðislega áreitni í garð að minnsta kosti einnar dóttur sem hann átti með þáverandi konu sinni, sem er leikkona. Hvað heitir leikstjórinn?

7.  En hvað heitir leikkonan sem hér um ræðir?

8.  Í útjaðri Vínarskógar, um 15 kílómetrum frá miðborg Vínarborgar, stendur kastali einn sem reistur var á 12. öld. Sá kastali er í eigu fjölskyldu sem hefur alla tíð síðan verið kennd við kastalann. Meginþorri fjölskyldunnar býr þó ekki lengur í þessum kastala, heldur flutti burt, og nú heitir heilt sjálfstætt ríki eftir þessari fjölskyldu og þar með eftir þessum kastala. Hvað heitir kastalinn? 

9.  63 þingmenn sitja á Alþingi Íslendinga. Hve margir þeirra voru kosnir af listum Sjálfstæðisflokksins 2017?

10.  Hvað er elsta fótboltaliðið sem nú spilar í ensku Úrvalsdeildinni? Til að hjálpa ykkur, þá vil ég taka fram að það er ekki eitt af þeim allra, allra frægustu.

***

Seinni aukaspurning:

Skjáskotið hér að neðan er hluti af auglýsingaplakati fyrir stutta teiknimynd um Andrés Önd frá 1942. Myndin þykir nokkuð óvenjuleg í röð mynda um Andrés Önd. Plakatið sýndi Andrés kasta tómati framan í ... hvern?

***

Svör við aðalspurningum:

1.  Ríkisskattstjóri.

2.  Leginum.

3.  Vänern.

4.  Stuðmenn.

5.  „... gröfum við okkur í fönn.“  

6.  Woody Allen.

7.  Mia Farrow.

8.  Liechtenstein.

9.  Sextán.

10.  Aston Villa.

***

Svör við aukaspurningum:

Á efri myndinni er Katrín Halldóra Sigurðardóttir leik- og söngkona. Óþarfi er að þekkja föðurnafnið.

Á neðri myndinni er Andrés að henda tómati framan í Adolf Hitler í myndinni The Fuehrer's Face.

***

Svo eru hér að neðan hlekkir á fyrri spurningaþrautir, eigi er fyrir það að synja.