Þetta er þemaþraut þar sem tala hennar endar á núlli. Þemað að þessu sinni eru rottur!

Fyrri myndaspurning:

Hvað heitir teiknimyndin þar sem þessi vinalega rotta (til vinstri) er aðalpersónan?

***

1.  Brúna rottan heitir á latínu rattus ... og svo kemur annað nafn sem er dregið af heiti á landi einu. Enginn veit almennilega af hverju brúnrottan er kennd við þetta land, en hvaða land er það?

2.  Uppvaxandi rokkhljómsveit gaf árið 1977 út plötu með latnesku heiti brúnrottunnar. Hvaða hljómsveit var það?

3.  En svartrottan sjálf — hvað heitir hún á latínu? Rattus ... hvað?

4.  Brúnrottur sem lifa villtar úti í náttúrunni (eða í holræsum) verða yfirleitt um tveggja ára gamlar ef meindýraeyðirinn nær ekki í skottið á þeim. En hversu gamlar verða svartrotturnar?

5.  Skáldsaga eftir Nóbelshöfund einn endar á þessum orðum: „Sá dagur kann að koma mönnum til ógæfu, að drepsóttin veki upp rottur sínar og sendi þær til að deyja í einhverri hamingjusamri borg.“ Hvað heitir skáldsagan?

6.  Plott fyrrnefndrar skáldsögu er sprottið af því að rottur hafa lengi verið grunaðar um að breiða út og dreifa einni illskeyttustu drepsótt sögunnar. Nýjustu rannsóknir benda til að það kunni að vera málum blandið, en hvaða drepsótt var þetta?

7.  Árið 1971 var gerð hryllingsmynd um ungan mann að nafni Willard sem verður aðeins of hrifinn af rottum. Það endaði með ósköpum, nema fyrir framleiðendur bíómyndarinnar (sem heitir Willard), en þeir græddu stórfé og gerðu því aðra mynd ári seinna, sem heitir eftir afar illskeyttri rottu sem Willard kom á legg. Hvað hét sú rotta og bíómyndin þar með?

8.  Í skáldsögu einni reynir vondi kallinn lengi að brjóta niður söguhetjuna Winston Smith á bak aftur andlega, en það tekst ekki fyrr en vondi kallinn uppgötvar að Smith er dauðhræddur við rottur og notar þær til að hræða úr honum líftóruna. Hvaða skáldsaga er þetta?

9.  Í smásögu einni má finna eftirfarandi setningu (í lauslegri þýðingu): „„Matilda Briggs var ekki nafnið á ungri konu, [NAFNI SLEPPT],“ sagði [ÖÐRU NAFNI SLEPPT] í upprifjunartón. „Þetta var skip sem kom við sögu í máli risarottunnar á Súmötru, en veröldin er ekki enn tilbúin til að heyra þá frásögn.““ Hver talar?

10. Rottur eru harla frjósamar. Hversu marga afkomendur gætu rottuhjón eignast á ÞREMUR árum ef allar hefðu nóg að bíta og brenna og gætu dafnað hindrunarlaust? Hér má muna einni milljón til eða frá.

***

Seinni myndaspurning:

Málverkið hér að neðan heitir Tvær rottur, en hver málaði það? Ég viðurkenni að þetta er MJÖG erfið spurning, því fæstir vita af þessu málverki og það er ekki beinlínis dæmigert fyrir verk listamannsins. Til að gefa ykkur smá vísbendingu, þá skal ég taka fram að verkið var málað 1884.

***

Svör við aðalrottuspurningum:

1.  Noregur.

2.  Hljómsveitin Stranglers gaf út plötuna Rattus Norvegicus.

3.  Rattus rattus.

4.  Eins árs.

5.  Plágan eftir Albert Camus.

6.  Svarti dauði.

7.  Ben.

8.  1984.

9.  Sherlock Holmes. 

10.  500 milljónir, svo rétt er allt frá 499-501 milljón. Ef einhver nær réttu svari við þessari spurningu má hann sæma sig lárviðarstigi með eikarlaufum og stjörnu.

***

Svör við myndaspurningum:

Rottan á efri myndinni er úr teiknimyndinni Ratatouille.

Rotturnar á neðri myndinni málaði Van Gogh.